Azərbaycan, Bakı, 3 iyun /Trend/
Azərbaycanın I Avropa Oyunlarını uğurla keçirməsi qarşıdakı İslam Həmrəyliyi Oyunları üçün uğurun təminatı olacaq. Bunu Trend-ə Azərbaycanın Əlcəzairdəki səfiri Mahir Əliyev deyib.
Onun sözlərinə əsasən, İslam ölkələrində I Avropa Oyunlarına maraq böyükdür və bu maraq qitənin tarixində ilk dəfə belə miqyaslı Oyunların keçirilməsi üçün Avropanın Azərbaycanı seçməsi fonunda artıb.
M.Əliyev qeyd edib ki, bu, daha çox I Avropa Oyunlarının keçirilməsini ölkəyə həvalə etmək üçün lazım olan bütün tələblərə Azərbaycanın cavab verməsi ilə əlaqədardır.
Diplomat əlavə edib ki, Azərbaycanda sabitlik, iqtisadi inkişaf, söz azadlığı və demokratiya var: "Bu meyarlar müasir sivilizasiyanın beşiyi olan Avropa üçün mühümdür və Avropa Azərbaycanı seçib".