Azərbaycan, Bakı, 26 may /Trend, müxbir İ.İsabalayeva/
"Eurovision-2012" mahnı müsabiqəsinə qatılacaq ölkələrin iştiraklarını təsdiqi proseduru noyabr ayında olacaq.
İctimai Televiziya və Radio Yayımları Şirkətinin (İTV) İctimaiyyətlə əlaqələr və monitorinq şöbəsinin rəhbəri Tahir Məmmədovun cümə axşamı Trend-ə verdiyi məlumata görə, ölkələrin müsabiqədə iştirakının təsdiqlənməsi tarixləri Avropa Yayım İttifaqı tərəfindən müəyyənləşdiriləcək.
Hazırda isə Azərbaycanda müsabiqənin keçirilməsi üçün hazırlıq işləri aparılır.
Müsabiqənin keçirilməsinə hazırlıq prosesinin müzakirəsi məqsədilə İTV-nin baş direktoru İsmayıl Ömərovun iyunun 20-də Avropa Yayım İttifaqının rəhbərliyi ilə görüşü nəzərdə tutulur.
Azərbaycan Prezidenti İlham Əliyev artıq "Eurovision-2012" mahnı müsabiqəsinin Bakı şəhərində keçirilməsi haqqında sərəncam verib.
Müsabiqənin keçirilməsi üçün YUNESKO-nun xoşməramlı səfiri, Heydər Əliyev Fondunun prezidenti Mehriban Əliyevanın sədrliyi ilə Təşkilat Komitəsi yaradılıb.
Təşkilat Komitəsi "Eurovision-2012" mahnı müsabiqəsinin təşkili və keçirilməsi ilə bağlı tədbirlər planı hazırlayıb həyata keçirməlidir.
Azərbaycan təmsilçiləri Eldar Qasımov və Nigar Camal (Ell/Nikki) "Running Scared" mahnısı ilə "Eurovision-2011" müsabiqəsinin qalibi oldu.
Müsabiqənin qaydalarına əsasən, qalib ölkə növbəti ildə yarışmanı keçirmək hüququnu qazanır.