Azərbaycan, Bakı, 14 yanvar /Trend/
Azərbaycanın "Eurovision" qalibləri Danirmarkanın milli seçimlərində münsif kimi təmsil olunur.
Trend-in şənbə günü İctimai Televiziyaya istinadən yaydığı məlumata görə, Azərbaycanın "Eurovision" qalibləri Eldar Qasımov və Nigar Camal, "Eurovision 2009"-un üçüncüsü Aysel Teymurzadə, tanınmış prodüser-bəstəkar İsa Məlikov və "Eurovision 2010"-un milli seçimlərində iştirak edən Dilarə Kazımova Danimarka təmsilçisinin müəyyənləşməsi üçün keçirilən seçimlərdə münsif kimi iştirak edirlər.
Münsiflərdə Azərbaycanla yanaşı, son dörd ildə müsabiqədə qalib gələn ölkələrdən nümayəndələr təmsil olunur. Bu sırada Rusiyadan müsabiqə təmsilçisi Aleksey Vorobyov, Anna Kulikova, Norveçdən Aleksandr Rıbak, Almaniyadan Peter Bergener, Roger Cicero və başqaları da var.
Ölkənin təmsilçisinin adı isə yanvarın 21-də məlum olacaq.
Müsabiqənin qaydalarına əsasən, nəticələrin hesablamasında 50% tamaşaçıların, 50% isə münsiflər heyətinin rəyi nəzərə alınacaq. Milli seçimlər Dansk Melodi Grand Prix adı altında baş tutacaq.