Bakı. Trend:
Bu gün Bakı Ağır Cinayətlər Məhkəməsində dələduzluqda təqsirləndirilən Ələddin Atakişiyevin cinayət işi üzrə məhkəmə prosesi davam etdirilib.
Trend-in məlumatına görə, hakim Telman Hüseynovun sədrliyi ilə keçirilən prosesdə məhkəmə istintaqı yekunlaşıb və prokuror çıxış edib.
Dövlət ittihamçısı Ə.Atakişiyevin 7 il 6 ay azadlıqdan mərhum edilməsini istəyib.
İş üzrə məhkəmənin növbəti prosesi noyabrın 3-nə təyin edilib.
İttihama görə, Ə. Atakişiyev əməkdar rəssam Yelena Haqverdiyevaya qarşı dələduzluqda təqsirləndirilir. O Yelena Haqverdiyevanın Ləhiş bağlarında olan torpaq sahəsinə çıxarış almaqda köməklik etməsi adı ilə əməkdar rəssamdan 15 min manat alsa da, həmin pulu mənimsəyib.
Ələddin Atakişiyevə qarşı Cinayət Məcəlləsinin 178.2.3-cü (külli miqdarda dələduzluq törətmək) maddəsi ilə cinayət işi başlanıb.