Bakı. Trend:
Bakıda keçiriləcək İqtisadi Əməkdaşlıq Təşkilatına üzv dövlətlərin Baş prokurorlarının 4-cü iclasında iştirak etmək üçün Baş prokuror Kamran Əliyevin dəvətilə Türkmənistan Baş prokurorunun müavini Allanazar Nyazlıevin rəhbərlik etdiyi nümayəndə heyəti ölkəmizə səfər edib.
Baş Prokurorluqdan Trend-ə verilən məlumata görə, Baş Prokurorluqda keçirilmiş ikitərəfli görüşdə qonağı səmimi salamlayan Baş prokuror Türkmənistanın bizim üçün yaxın dost ölkə olduğunu qeyd edərək ölkələrimiz arasında münasibətlərin bütün sahələrdə yüksək səviyyədə inkşaf etdiyini vurğulayıb.
Baş prokuror hər iki ölkənin beynəlxalq və regional təşkilatlar, xüsusilə ortaq irsə əsaslanan Türk Dövlətləri Təşkilatı çərçivəsində sıx əməkdaşlıq etdiyini və möhkəm qarşılıqlı əlaqələr qurduğunu diqqətə çatdırıb.
Nümayəndə heyətinin rəhbəri Allanazar Nyazlıyev qonaqpərvərliyə, səmimi qəbula görə təşəkkürünü bildirərək ölkəsinin prokurorluq orqanlarının Azərbaycan Respublikasının prokurorluq orqanları ilə əməkdaşlığa daim önəm verdiyini, bu əməkdaşlığın gələcəkdə daha da möhkəmləndirilməsinin vacibliyini vurğulayıb.
Görüşdə hüquqi sahədə əməkdaşlıq üzrə faydalı fikir mübadiləsi aparılıb, qarşılıqlı səmərəli fəaliyyətin bundan sonra da uğurla davam etdiriləcəyinə əminlik ifadə olunub.
Görüşdə Azərbaycan Respublikasının Türkmənistanda fövqəladə və səlahiyyətli səfiri Qismət Gözəlov və Türkmənistanın ölkəmizdəki fövqəladə və səlahiyyətli səfiri Qurbanməmmet Elyasov da iştirak edib.