Azərbaycan, Bakı, 24 iyul /Trend, müxbir K.Zərbalıyeva/
Yardımlıda minik avtomobilinin dərəyə yuvarlanması nəticəsində 3 nəfər ölüb, bir nəfər xəsarət alıb.
Trend-in FHN-nin rəsmi saytına istinadən verdiyi məlumata görə, Yardımlı rayonu, Gügəvar kəndində "VAZ" markalı minik avtomobili dərəyə yuvarlanıb. Dərhal Fövqəladə Hallar Nazirliyinin müvafiq xilasetmə qüvvələri hadisə yerinə cəlb olunub.
Hadisə yerində əməliyyat şəraiti qiymətləndirilərkən məlum olub ki, 1976-cı il təvəllüdlü Fəxrəddin Məmməd oğlu Hüseynov, 1966-cı il təvəllüdlü İlqar Xaməməd oğlu Hümbətov və 1968-ci il təvəllüdlü Gülşad Qabil oğlu Əliyev hadisə yerində ölüb, 1 nəfər xəsarət alıb.
Qeyd olunan şəxslərin cəsədləri yanğınsöndürən-xilasedicilər tərəfindən müvafiq qaydada götürülüb və aidiyyəti üzrə təhvil verilib. Əməliyyat iyulun 24-nə keçən gecə saat 01:17-də başa çatıb.