Bakı. Trend:
Səudiyyə Ərəbistanının "Əl-Hilal" futbol klubu braziliyalı ulduz hücumçu Neymarla müqaviləni rəsmən ləğv edib.
Trend xəbər verir ki, bu barədə klubun mətbuat xidməti məlumat yayıb.
Açıqlamada qeyd edilib ki, 32 yaşlı Neymar karyerasını başladığı Braziliyanın "Santos" klubunda davam etdirəcək.
2017-ci ildə Neymar 222 milyon avro qarşılığında "Barselona"dan PSJ-yə keçərək dünya futbol tarixində rekord məbləğə transfer edilmişdi. O, PSJ-də 5 dəfə Fransa çempionu, 4 dəfə ölkə Superkuboku qalibi olub, həmçinin 3 dəfə Fransa Kubokunu və 2 dəfə Liqa Kubokunu qazanıb.