Azərbaycan, Bakı, 16 sentyabr/ Trend , müxbir R.Novruzov/ ATƏT-in Minsk Qrupunun həmsədrləri Azərbaycan, Ermənistan və Türkiyə xarici işlər nazirlərinin Nyu-Yorkda keçiriləcək danışıqlarına qoşulmayacaqlar.
Üç ölkənin xarici işlər nazirləri Elmar Məmmədyarov, Edvard Nalbandyan və Əli Babacanın görüşü Türkiyə XİN rəhbərinin təşəbbüsü ilə BMT Baş Assambleyasının çərşənbə axşamı Nyu-Yorkda işə başlayacaq sessiyası çərçivəsində baş tutacaq. Görüşdə Ermənistan və onun qonşuları - Azərbaycan Türkiyə arasında münasibətlərin normallaşdırılması yolları, Dağlıq Qarabağ münaqişəsinin həlli yollarını müzakirə etmək planlaşdırılır.
İki Cənubi Qafqaz ölkəsiarasında münaqişə 1988 - ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Dağlıq Qarabağ və ona bitişik yeddi rayon - Azərbaycan ərazisinin 20 faizi Ermənistan Silahlı Qüvvələrinin işğalı altındadır. 1994 - cü ilin mayında tərəflər atəşkəs rejiminə dair razılaşma əldə ediblər və o vaxtdan bəri, ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə, hələ ki nəticəsiz, sülh danışıqları aparılır.
"Görüş təşəbbüsü Türkiyə tərəfdən gəlib və biz, hələ ki, onlara qoşulmaq barədə dəvət almamışıq", - ATƏT-in Minsk Qrupunun rusiyalı həmsədri Yuri Merzlyakov çərşənbə axşamı telefonla Trend - a bildirib.
ATƏT-in Minsk Qrupu həmsədrləri formatının genişləndirilməsi, Ermənistan-Azərbaycan münaqişəsinin həllində daha fəal rol oynamağa səy göstərən rəsmi Ankaranın sonuncu təşəbbüsünü nəzərə almaqla, Türkiyənin bu formata qoşulması imkanlarını şərh edən rusiyalı həmsədr bildirib ki, o, bunun mümkünlüyünü istisna etməsə də, hər şey Minsk Qrupunun bütün üzvlərinin konsensusundan asılı olacaq.
Müəlliflə əlaqə saxlamaq üçün elektron ünvan - [email protected]
