Azərbaycan, Bakı, 12 iyun / Trend , müxbir A.Hüseynbala / Azərbaycanın Dağlıq Qarabağ bölgəsinin azərbaycanlı icmasının İdarə Heyətinin üzvləri ATƏT-in Minsk qrupu həmsədrlərinin Bakıya növbəti səfəri zamanı onlarla görüşəcəklər.
"İdarə Heyətinin iclasında icmanın Əlaqələndirmə Şurasının fəaliyyəti ilə bağlı proqram müzakirə edilib və 15 nəfərin təmsil olunduğu müxtəlif işçi qruplar yaradılıb", - cümə axşamı Trend -a İdarə Heyətinin üzvü, millət vəkili Elman Məmmədov bildirib.
Trend -un arayışı: İyunun 5-də Dağlıq Qarabağ bölgəsinin azərbaycanlı icmasının ilk qurultayı keçirilib. Qurultayda Şuşa Rayon İcra Hakimiyyətinin başçısı Bayram Səfərov icmanın sədri seçilib.
İcmanın ilk rəhbəri Şuşanın mərhum icra başçısı Nizami Bəhmənov olub. Bəhmənov ATƏT-in Minsk qrupu çərçivəsində aparılan sülh danışıqlarında "Dağlıq Qarabağın Azərbaycanlı İcması"nı da həmin ildən Şuşa Rayon İcra Hakimiyyətinin başçısı kimi təmsil edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20 faizi, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Məmmədovun sözlərinə görə, iclasda İdarə Heyətinin üzvlərinin görəcəkləri işlərlə də bağlı bölgü aparılıb. "Bizim əsas fəaliyyətimiz beynəlxalq təşkilatlarla əlaqə qurmaq, ölkə daxilində icma üzvləri ilə işləməkdir. İdarə Heyətinin üzvləri elm və təhsil, eləcə də informasiya-analitika sahəsində də ciddi işlər görülməsini nəzərdə tutublar", - icmanın həmtəsisçisi əlavə edib.
Millət vəkili deyib ki, yaxın müddətdə icmanın mətbuat orqanı və internet saytı da fəaliyyətə başlayacaq.
Məqalə müəllifi ilə əlaqə ünvanı:[email protected]