Azərbaycan, Bakı, 7 sentyabr /Trend, müxbir M.Əliyev/
Avropa İttifaqının Cənubi Qafqaz üzrə xüsusi nümayəndəsi qeyd edib ki, məcburi köçkünlər problemi regionda gedən proseslər üçün ciddi maneədir. Bu barədə çərşənbə axşamı Trend-ə Dağlıq Qarabağın azərbaycanlı icmasının rəhbəri Bayram Səfərov Aİ-nin xüsusi nümayəndəsi Piter Semnebi ilə görüşünü şərh edərkən bildirib.
"Semnebinin sözlərinə görə, münaqişənin həlli üzrə sülh sazişi imzalanarkən, iki aspekt nəzərə alınmalıdır: Azərbaycanın ərazi bütövlüyü və məcburi köçkünlərin öz doğma evlərinə qayıtmaları", - Səfərov deyib.
Görüş zamanı Aİ-nin xüsusi nümayəndəsi bir vaxtlar tərəflər arasında mövcud əlaqələrin bərpasının münaqişənin həllinə kömək edəcəyinə inandığını bildirib.
"Azərbaycanın ərazi bütövlüyü bərpa olunmadan Ermənistanla iqtisadi əməkdaşlığın bərpasından söhbət belə gedə bilməz", - görüşdə Səfərov bildirib. - "Məcburi köçkünlər səbirsizliklə öz doğma torpaqlarına qayıdacaqlarını gözləyir və Dağlıq Qarabağda Azərbaycanın qanunları ilə yaşayacaq ermənilərlə dinc yanaşı yaşamağa razıdırlar".
Aİ-nin Cənubi Qafqaz üzrə xüsusi nümayəndəsi Piter Semnebi sentyabrın 6-dan Azərbaycanda səfərdədir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan silahlı qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.