...

Aydın Səfixanlı: Qarabağa səfər edən Türkiyə vətəndaşlarının əməlinə hüquqi qiymət verilməməsi iki ölkənin beynəlxalq müqavilələrinin tələblərinə ziddir

Ermənistan-Azərbaycan münaqişəsi Materials 16 Oktyabr 2017 10:19 (UTC +04:00)
Dağlıq Qarabağa səfər edən Türkiyə vətəndaşlarının əməlinə hüquqi qiymətin verilməməsi Azərbaycan və Türkiyənin iştirakçısı olduğu beynəlxalq müqavilələrin tələblərinə ziddir.
Aydın Səfixanlı: Qarabağa səfər edən Türkiyə vətəndaşlarının əməlinə hüquqi qiymət verilməməsi iki ölkənin beynəlxalq müqavilələrinin tələblərinə ziddir

Trend-i buradan izləyin

Bakı. İlhamə İsabalayeva - Trend:

Ermənistan silahlı qüvvələri tərəfindən işğal olunan Azərbaycan ərazisi Dağlıq Qarabağa səfər etməklə Azərbaycan Respublikası Cinayət Məcəlləsinin 318.2-ci (Azərbaycan Respublikasının dövlət sərhədini qanunsuz olaraq keçmə) maddəsində nəzərdə tutulmuş cinayət törətmiş Türkiyə vətəndaşlarının əməlinə Turkiyənin hüquq-mühafizə orqanları tərəfindən bu günədək hüquqi qiymət verilməməsi Azərbaycan və Türkiyənin strateji əməkdaşlığı, dostluq və qardaşlıq münasibətlərinin ruhuna uyğun olmamaqla yanaşı, hər iki dövlətin iştirakçısı olduğu beynəlxalq və ikitərəfli müqavilələrin tələblərinə də ziddir.

Bunu Trend-ə Ombudsman Aparatının rəhbəri, hüquq üzrə fəlsəfə doktoru Aydın Səfixanlı deyib.

O qeyd edib ki, Azərbaycan və Türkiyə “Cinayət işləri üzrə qarşılıqlı hüquqi yardım haqqında” Avropa Konvensiyasının iştirakçısı olmaqla, hüquqi yardım haqqında sorğu edilən zaman sorğu edən tərəfin cinayət qanunvericiliyində nəzərdə tutulan cinayətlərə görə, cinayət təqibinin həyata keçirilməsində qarşılıqlı əsaslarla bir-birinə ən geniş hüquqi yardımın göstərilməsini öz öhdələrinə götürüblər. Bununla yanaşı, Azərbaycan ilə Türkiyə arasında “Mülki, ticarət və cinayət işləri üzrə qarşılıqlı hüquqi yardım göstərilməsi haqqında” ikitərəfli müqavilədə imzalanmış və tərəflər bu müqaviləyə əsasən də öz üzərlərinə öhdəliklər götürüblər.

A.Səfixanlı deyib ki, Azərbaycan Baş Prokurorluğu tərəfindən artıq hüquqi prosedura uyğun olaraq, Azərbaycan Respublikasının dövlət sərhədini qanunsuz olaraq keçərək cinayət əməli törətmiş Türkiyə vətəndaşlarının tutularaq istintaqa cəlb olunmaları məqsədi ilə Türkiyə hüquq-mühafizə orqanlarına müraciət edilib: "Təbii ki, biz Azərbaycan və Türkiyə arasında olan dostluq, qardaşlıq, strateji tərəfdaşlıq münasibətlərini, o cümlədən hər iki dövlətin iştirakçısı olduğu beynəlxalq və ikitərəfli müqavilələrdən irəli gələn öhdəlikləri nəzərə alaraq, qısa bir müddət ərzində Türkiyənin müvafiq qurumları tərəfindən bu istiqamətdə ciddi hüquqi addımların atılacağını gözləyirdik. Lakin bu addımların əvəzinə cinayət törətmiş şəxslərin Türkiyə mətbuatında öz səfərlərini işıqlandırmaları, orada antiazərbaycan və antitürkiyə xarakterli, ermənipərəst fikirlər səsləndirmələri üçün rahat imkanların yaradılması haqlı olaraq Azərbaycan cəmiyyətində narahatlıq və təəccüb hissi doğurur. İnanırıq ki, Türkiyə dövləti Azərbaycanla Türkiyənin qardaşlıq, dostluq, strateji tərəfdaşlıq münasibətlərinin ruhuna uyğun olmayan bu hadisələri törətmiş şəxslərin cəzalandırılması və gələcəkdə bu kimi hadisələrin qarşısının alınması məqsədilə tez bir zamanda lazımi hüquqi addımlar atacaq".

Qeyd edək ki, sentyabrın 22-də Türkiyə vətəndaşları Ufuk Uras, Əli Bayramoğlu, Səid Çəkinoğlu və Erol Katırçıoğlu Ermənistan silahlı qüvvələri tərəfindən işğal olunan Azərbaycan ərazisi Dağlıq Qarabağa qeyri-qanuni səfər ediblər. Azərbaycan Baş Prokurorluğunun Ağır Cinayətlərə Dair İşlər üzrə İstintaq İidarəsində Cinayət Məcəlləsinin 318.2-ci (Azərbaycan Respublikasının dövlət sərhədini qanunsuz olaraq keçmə) maddəsi ilə bu şəxslər barəsində cinayət işi başlanılıb. Onlar Cinayət Məcəlləsinin qeyd olunan maddəsi ilə təqsirləndirilən şəxs qismində cəlb olunmaqla barələrində məhkəmənin qərarları ilə həbs qətimkan tədbiri seçilərək dövlətlərarası axtarışa verilib. Həmin şəxslərin tutularaq istintaqa cəlb olunmaları məqsədilə Türkiyə hüquq-mühafizə orqanlarına müraciət edilib.

Məqalədə:
Xəbər lenti

Xəbər lenti