Azərbaycan, Bakı, 13 fevral /" müxbir İ.Əlizadə/ Azərbaycan Parlamentində təmsil olunan Müsavat deputat qrupu müxalifətin fəaliyyətinin tənzimlənməsi və müxalifətçi partiyaların fəaliyyəti üçün dövlət tərəfindən əlavə təminatlar verilməsini nəzərdə tutan qanun layihəsi hazırlayıb. "Qanun layihəsində müxalifət partiyalarının qərargahla təmin edilmələri, müxalifət partiyaları üçün dövlət televiziya və radiosunda efir vaxtı ayrılması, eləcə də dövlət büdcəsindən maliyyələşən rəsmi qurumlarda müxalifət partiyalarının üzvləri üçün kvota nəzərdə tutulması əksini tapıb" - deyə çərşənbə günü Trend ə açıqlamasında Müsavat deputat qrupunun üzvü Pənah Hüseyn bildirib.
Millət vəkili qeyd edib ki, "Müxalifətçilik fəaliyyəti haqqında" qanun layihəsi baxılması üçün bu həftə Milli Məclisə təqdim edəcəklər.
Hüseynin sözlərinə görə, qanun layihəsində müxalifətçi deputatların parlament fəaliyyəti ilə bağlı bir çox məsələlər, o cümlədən Milli Məclisin, komissiyaların rəhbərliyində təmsil olunmaq məsələsinə yer ayrılıb. Layihəyə əsasən, hakimiyyətin siyasətini dəstəkləməyən siyasi təşkilatlar müxalifət partiyaları hesab olunurlar.
"Dünyanın inkişaf etmiş demokratik ölkələri müxalifət partiyalarının fəaliyyəti ilə bağlı ayrıca qanun qəbul ediblər. Bu qanunun Azərbaycanda da qəbul olunması demokratik inkişaf və plüralizim baxımından böyük əhəmiyyətə malikdir" - deyə Hüseyn əlavə edib.
Onun sözlərinə görə, rəy və əlavə təkliflərini vermək üçün qanun layihəsini Müsavat və Xalq Cəbhələri partiyalarına təqdim ediblər. Lakin bu partiyalar qanuna rəy və təkliflərini verməyiblər.
Hakim Yeni Azərbaycan Partiyası (YAP) isə hesab edir ki, müxalifət partiyalarının fəaliyyəti ilə bağlı ayrıca qanuna ehtiyac yoxdur.
"Azərbaycanda "Siyasi partiyalar haqqında" qanun qəbul olunub. Bu qanun siyasi fəaliyyəti tənzimləyir və siyasətlə məşğul olmağın sərhədlərini müəyyənləşdirir. Ona görə də müxalifətin fəaliyyəti ilə bağlı ayrıca qanuna ehtiyac yoxdur" - deyə YAP icra katibinin müavini, millət vəkili Mübariz Qurbanlı bildirib.
O qeyd edib ki, bundan başqa, Konstitusiya fikir plüralizmi, vicdan, söz və siyasi fəaliyyət azadlığına təminat verir. Bütün bunlar siyasi fəaliyyətin bütün cəhətlərini tənzimləyir.
"Müxalifətçilik siyasi fəaliyyətdir. Siyasi fəaliyyəti tənzimləyən qanun varsa, müxalifətin fəaliyyəti ilə bağlı ayrıca qanuna nə ehtiyac var? Bu məntiqlə götürsək, onda iqtidarın, bitərəflərin fəaliyyəti ilə bağlı da qanun qəbul olunmalıdır. Yəqin ki, Pənah Hüseyn işsizlikdən belə bir qanun layihəsi hazırlayıb" - deyə hakim partiyanın rəsmisi əlavə edib.
Müsavat deputat qrupu Parlamentdə müxalifəti təmsil edir. Qrupun beş üzvü var.
Müəlliflə əlaqə saxlamaq üçün elektron ünvan- [email protected]
