Azərbaycan, Bakı, 3 mart / Trend müxbir S.Ağayeva/ Azərbaycan BMT-nin insan haqları Şurasının müzakirəsinə hərbi münaqişələr nəticəsində İtkin düşmüş insanların haqları ilə bağlı məsələni çıxaracaq. Müvafiq qətnamə layihəsi martın 3-dən 28-ə kimi Cenevrədə keçəcək BMT-nin insan haqları Şurasının yeddinci sessiyasında müzakirəyə çıxarılacaq. Bu barədə Trend a telefonla Berndən Azərbaycanın BMT yanında daimi nümayəndəsi Elçin Əmirbəyov məlumat verib.
Erməni təcavüzündən ziyən çəkən ölkə kimi Azərbaycan qətnamə layihəsini Şuranın müzakirəsinə çıxarmağı vacib sayıb. Azərbaycanın Əsir və İtkin düşənlər üzrə Dövlət Komissiyasının məlumatına əsasən erməni təcavüzü nəticəsində 4353 azərbaycanlı İtkin düşüb. Sonuncu dəfə layihə BMT Baş Assambleyasında müzakirə olunanda onu dünyanın 60-dan çox ölkəsi dəstəkləyib.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
İnsan haqları üzrə komissiyanın ləğvi və eyni adlı Şuranın yaradılması ilə bağlı qərar 2005-ci ildə BMT-nin Sammitində qəbul olunub. Şuranın səlahiyyətləri və yaradılma qaydaları haqda qətnamə 2006-cı ilin 15 martında BMT Baş Assambleyasının müsbət rəyini alıb. Onun tərkibinə BMT-yə üzv olan 47 dövlət, o cümlədən Azərbaycan daxil olub.
Əmirbəyovun məlumatına görə, sessiyanın açılış mərasimində BMT-nin baş katibi Pan Gi Mun, BMT-nin insan haqları üzrə ali komissarı Luiz Arbu, habelə Şura üzvü olan dövlətlərin yüksək çinli nümayəndələri çıxış ediblər. Azərbaycan nümayəndə heyəti də ümumi debatlarda iştirak edəcək.
