Azərbaycan, Qazax, 16 aprel / Trend , müxbir N.Fətullayeva/ Tovuz polisi quldurluqla məşğul olan cinayətkar dəstənin iki üzvünü zərərsizləşdirib.
Tovuz rayon Polis Şöbəsinin istintaq bölməsinin rəisi Oruc Əmiraslanov Trend a bildirib ki, saxlanılanlar Ağcabədi rayonunun Hindağ kənd sakinləri, 21 yaşlı Xaliq Tağıyev və 28 yaşlı Zabir Aslanov "maşın bazarı" adlanan ərazidə yeməkxanaya basqın ediblər. Basqınçılar yeyib-içdikdən sonra yeməkxananın 3 qadın işçisini zorlayaraq qarət ediblər.
Basqınçılar qızıl-zinət əşyaları, iki ədəd "Simens" markalı mobil telefon və 60 manat pul oğurlayıblar. Belə ki, maskalı basqınçılar yeməkxananın işçiləri olan Tovuz sakinləri 48 yaşlı Qaragöz Hüseynovaya, 33 yaşlı Vəsilə Musayevaya və 33 yaşlı Gülbəniz Qasımovaya silahla hədə-qorxu gəliblər, fiziki zor tətbiq edərək onları soyublar.
Onlar əldə etdikləri qızıl-zinət əşyalarını 170 manata Tərtər rayonunda satıblar. Aparılan əməliyyat tədbirləri nəticəsində saxlanılan şəxslər tutulub və onlar törətdikləri cinayəti könüllü şəkildə etiraf ediblər. Bildiriblər ki, bu əməli törətməyə onları qrupun rəhbəri Cahandar Quliyev məcbur edib.
Dəstənin digər üzvləri Cahandar Quliyev və Nahid Atayevin axtarışı üçün əməliyyat tədbirləri davam etdirilir.
Quliyev oğurluq etdiyinə görə əvvəllər də məhkum edilib.
Faktla bağlı Tovuz rayon Polis Şöbəsində Cinayət Məcəlləsinin quldurluq (181) maddəsi ilə cinayət işi açılıb.
Məqalənin müəllifi ilə [email protected] ünvanı ilə əlaqə saxlaya bilərsiniz
