Azərbaycan, Bakı, 22 aprel/ Trend , müxbir İ.Əlizadə/ Dağlıq Qarabağ münaqişəsi həll olunmayana qədər Azərbaycan, Gürcüstan və Ermənistanın iştirakı ilə Cənubi Qafqaz Parlament Assambleyasının yaradılması mümkün deyil və Azərbaycan tərəfi buna razılıq verməyəcək. "Cənubi Qafqaz Parlament Təşəbbüs Qrupu Azərbaycan və Ermənistan arasında əlaqələrin qurulması üçün yaradılmışdı. Lakin bu gun Azərbaycan və Ermənistan arasında heç bir əlaqə yoxdur. Ona görə də Parlament Assambleyasının yaradılması mümkün deyil", - deyə çərşənbə axşamı Trend -a açıqlamasında Azərbaycanın Cənubi Qafqaz Parlament Təşəbbüs Qrupundakı nümayəndə heyətinin rəhbəri, millət vəkili Siyavuş Novruzov bildirib.
Böyük Britaniyanın LİNKS qeyri-hökumət təşkilatının vasitəçiliyi ilə bir neçə il əvvəl Azərbaycan, Gürcüstan və Ermənistan nümayəndələrindən ibarət Cənubi Qafqaz Parlament Təşəbbüs Qrupu yaradılıb. LİNKS-in rəhbəri Denis Sammut təşəbbüs qrupu əsasında Cənubi Qafqaz Parlament Assambleyasının yaradılması təklifi ilə çıxış edib.
Novruzov hesab edir ki, Cənubi Qafqaz Parlament Təşəbbüs Qrupunun növbəti iclaslarının Bakı və Yerevanda keçirilməsi də mümkün deyil.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
Məqalə müəllifi ilə əlaqə ünvanı: [email protected]