Azərbaycan, Bakı, 08 may/ Trend , müxbir E.Babayev, M.Əliyev/ ABŞ hökuməti Azərbaycanda oktyabrın 15-də keçiriləcək prezident seçkilərində səslərin paralel hesablanmasının aparılmasını maliyyələşdirəcək.
Prezident seçkilərində exit-polldan [səsvermə prosedurundan sonra seçicilərin bilavasitə seçki məntəqələrinin çıxışında sorğusu] başqa, səslərin paralel hesablanması keçiriləcək. Səslərin paralel hesablanması mexanizminə əsasən, müstəqil müşahidəçilər səsvermənin yekunları üzrə protokolların və digər sənədlərin surətini alacaq və paralel hesablama aparacaqlar.
ABŞ -ın Azərbaycandakı səfirliyinin nümayəndəsi Conatan Henikin cümə axşamı Trend -a bildirdiyinə görə, yaxın vaxtlarda paralel hesablamanın təfərrüatı müəyyən ediləcək. O qeyd edib ki, hazırda paralel hesablamanın hansı regionları əhatə edəcəyi, onun üçün hansı məbləğin ayrılacağı, hesablamada seçicilərin neçə faizinin iştirak edəcəyi və hesablamanı kimin aparacağı məsələləri nəzərdən keçirilir.
İlkin yoxlamalardan sonra Azərbaycanın seçici siyahısına 4 683 400 seçicinin adı daxil edilib.
Azərbaycanın Mərkəzi Seçki Komissiyasının katibi Natiq Məmmədov cümə axşamı Trend -a bildirib ki, Azərbaycanda seçkilərdə səsvermənin yekunlarına dair bütün protokollar İnternetdə yerləşdirilir. "Buna görə, hər bir insan, o cümlədən MSK-da akkreditasiya ounmuş müşahidəçilər İnternet vasitəsilə protokollara çıxışa malikdirlər", - Məmmədov bildirib.
ABŞ hökuməti Azərbaycanda demokratik prezident seçkisinin keçirilməsi üçün üç mln. dollar ayırıb. Henikin sözlərinə görə, bu məbləğin müəyyən hissəsi səslərin paralel hesablanmasının aparılmasına sərf edilə bilər.
Azərbaycan Prezidenti İcra Aparatının rəhbəri Ramiz Mehdiyev bir müddət əvvəl, Azərbaycanda seçkilərin keçirilməsi üçün Vaşinqtonun ayırdığı üç mln. dolları ölkənin daxili işlərinə müdaxilə kimi qiymətləndirib."ABŞ hansısa ölkənin onun daxili proseslərinə müdaxiləsinə imkan verməzdi. Belə olan halda, nə üçün Azərbaycanla belə bir şey baş verməlidir? ", - o bildirib.
Mehdiyevin sözlərinə görə, seçkilər ərəfəsində beynəlxalq təşkilatlar və ya ayrı-ayrı ölkələr Azərbaycana təzyiq göstərməyə cəhd göstərirlər.
"Lakin buna baxmayaraq, Azərbaycanda şəffaf və demokratik seçkilər keçiriləcək", - administrasiya rəhbəri bildirib.
ATƏT, Avropa Şurası və Avropa Komissiyasının Azərbaycandakı nümayəndələri bu il keçiriləcək prezident seçkisi ilə bağlı dəstək proqramını açıqlayıblar.
Dəstək proqramında göstərilib ki, seçki prosesinə cəlb edilmiş icra strukturlarının və iştirakçıların təcrübəsini və müstəqilliyini möhkəmləndirmək, müstəqil, bütün namizədlərin seçki kampaniyalarının qərəzsiz yayımını təmin edən mediaya öz töhfəsini vermək, sərbəst toplaşma azadlığı hüququnun dəstəklənməsinə yardım göstərmək, həmçinin ,ictimaiyyətin seçki prosesinə marağını artırmaq lazımdır.
Müəlliflə əlaqə saxlamaq üçün elektron ünvan: [email protected]
