Azərbaycan, Bakı, 26 may/ Trend , müxbir E.Babayev/ Azərbaycanın müxalif Böyük Quruluş Partiyası (BQP) Dövlət Əmlakının İdarə Edilməsi üzrə Dövlət Komitəsini məhkəməyə verməyə hazırlaşır. "Bu komitə bizim qərargahla bağlı müraciətlərimizə məhəl qoymur və biz öz hüququmuzu məhkəmə vasitəsilə qoruyacağıq", bazar ertəsi Trend -a BQP sədri, millət vəkili Fazil Qəzənfəroğlu məlumat verib.
Trend -un arayışı: BQP Dövlət Əmlakının İdarə Edilməsi üzrə Dövlət Komitəsinə partiyaya qərargah ayrılması üçün müraciət edib. Komitə partiyanın ilk müraciətinə cavab olaraq yer ayırsa da, BQP həmin yerin əlverişsiz olduğunu bildirib.
Müxalifət partiyalarından Azərbaycan Xalq Cəbhəsi (AXCP), Vətəndaş və İnkişaf (VİP) və Milli İstiqlal (AMİP) partiyaları da qərargahsız qalıb. Həmin partiyalar qərargah problemi ilə bağlı bir neçə dəfə Dövlət Komitəsinə müraciət edib.
Qəzənfəroğlu vurğulayıb ki, iyun ərzində məhkəməyə müraciət olunması nəzərdə tutulur. "Biz indi komitənin fəaliyyəti ilə bağlı məlumatlar toplayırıq. Artıq müəyyən səhmdarlarla təmaslarımız var. Biz çox ciddi faktlar aşkar etmişik və onları cəmiyyətə çatdırmaq niyyətindəyik" deyən Qəzənfəroğlu deyib ki, bununla yanaşı BQP ATƏT, Avropa Şurası və digər beynəlxalq qurumlara da müraciət hazırlayır. Həmin müraciətlərdə partiyanın elementar fəaliyyətinə belə imkan yaradılmadığı əksini tapacaq. "Biz qərargah problemi ilə bağlı hər hansısa aksiya keçirməyi isə planlaşdırmırıq" - deyə o əlavə edib.
Müxalifətyönlü BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Fazil Qəzənfəroğlu Milli Məclisin deputatıdır.
Dövlət Əmlakının İdarə Edilməsi üzrə Dövlət Komitəsinin mətbuat xidmətindən isə Trend -a bildirilib ki, komitənin əsas vəzifəsi partiyaları qərargahla təmin etmək deyil. Bununla belə, komitə dövlətin hesabında olan və icarəyə verilməsi mümkün olan yerləri partiyalara təklif edir. Onlar isə həmin yerləri bəyənmirlər.
Məqalə müəllifi ilə əlaqə ünvanı: [email protected]