Azərbaycan, Bakı, 12 iyun/ Trend , müxbir C.Babayeva, İ.Əlizadə/ Azərbaycanın müxalifətyönlü Azərbaycan Demokrat Partiyası (ADP) Seçki Məcəlləsinə seçki komissiyalarının yenidən formalaşdırılması ilə bağlı dəyişiklik edilməməsinə etiraz olaraq, Konstitusiya Məhkəməsinə müraciət edib. "Milli Məclisə (parlament) keçirilən seçkilərdə iştirak edərək deputat mandatı qazanan siyası partiyalar blokunun Mərkəzi Seçki Komissiyasının (MSK) formalaşdırılmasında iştirak etməməsi Seçki Məcəlləsində hüquqi boşluğun olduğunu göstərir və Konstitusiya Məhkəməsi bu boşluğu aradan qaldırılmalıdır", -deyə cümə axşamı ADP-nin Konstitusiya Məhkəməsinə göndərdiyi müraciətdə bildirilib. Bu barədə Trend -a partiyanın mətbuat xidmətindən məlumat verilib.
Trend -un arayışı: Avropa Şurasının Venesiya Komissiyası seçki komissiyalarının tərkibinin yenidən foomalaşdırılması ilə bağlı tövsiyələr versə də, Azərbaycan hökuməti həmin tövsiyələri qəbul etməyib. Müxalifət və beynəlxalq təşkilatlar seçki komissiyalarının yenidən formalaşdırılmasını tələb edirlər. Azərbaycan hakimiyyəti isə, seçki komissiyalarının tərkibini normal hesab edir və dəyişidirilməsinə ehtiyac görmür. Azərbaycan parlamenti iyunun ikisində Seçki Məcəlləsinə əlavə və dəyişiklikləri qəbul edib.
"Seçki Məcəlləsinin 24.3-cü maddəsinə görə, MSK-nın altı üzvü Milli Məclisdə çoxluq təşkil edən siyasi partiyanı, altı üzvü heç bir siyasi partiyaya mənsub olmayan-müstəqil deputatları, altı üzvü deputatları qanunverici orqanda azlıq təşkil edən siyasi partiyaları təmsil edir. Qanunvericilikdə siyasi partiyalar blokunun MSK-nın formalaşdırılmasında iştirakı ilə bağlı heç bir müddəa yoxdur. Belə halda, Milli Məclisə seçkilərdə iştirak edən siyasi partiya bloklarının MSK-nın təşkil olunmasında iştirak hüququ pozulmuş olur ki, bu da huquqi baxımdan məntiqsiz və Konstitusiyaya ziddir", - deyə partiyanın müraciətində bildirilib.
Müraciətdə Milli Məclisə keçirilən seçkilərdə iştirak edən və parlamentdə bir neçə deputatla təmsil olunan siyasi partiyalar blokunun MSK-nın formalaşdırılmasında iştirak etməməsinə gətirib çıxaran Seçki Məcəlləsinin 24-cü maddəsinin Konstitusiyaya uyğunluğu haqqında rəy verilməsi və 2005-ci ildə Milli Məclisə keçirilən seçkilərdə siyasi partiyalar blokunda iştirak edən partiyaların MSK-nın formalaşdırılmasında iştirak huququnun bərpası ilə bağlı qərar qəbul edilməsi xahiş olunur.
Trend -un arayışı: Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. 2007-ci ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq, keçmiş sədr Rəsul Quliyev və tərəfdarları ADP-dən imtina edərək, özlərinin Açıq Cəmiyyət Pariyasını yaradıblar.
Məqalə müəllifi ilə əlaqə saxlamaq üçün ünvan - [email protected]