Azərbaycan, Bakı, 17 iyun/ Trend , müxbir İ.Əlizadə/ "Demokratiya və İqtisadi İnkişaf Naminə Təşkilat - GUAM" ölkələrinin Avropa Şurası Parlament Assambleyasındakı (AŞPA) nümayəndə heyətlərinin rəhbərləri gələcək fəaliyyətlərini əlaqələndirmək üçün iyunun sonunda Strasburqda məsləhətləşmələr aparacaqlar. "GUAM ölkələrinin nümayəndə heyətlərinin rəhbərləri AŞPA-dakı fəaliyyətlərini əlaqələndirmək üçün məsləhətləşmələr aparacaqlar. AŞPA-nın yay sessiyasında müzakirə olunan məsələlərlə bağlı vahid mövqe ortaya qoyacaqlar", - deyə çərşənbə günü Trend -a açıqlamasında AŞPA-nın vitse-prezidenti, Azərbaycanın qurumdakı nümayəndə heyətinin rəhbəri Səməd Seyidov bildirib.
"Demokratiya və İqtisadi İnkişaf Naminə Təşkilat - GUAM"a Azərbaycan, Gürcüstan, Ukrayna və Moldova daxildir.
Trend -un arayışı: AŞPA-nın yay sessiyası iyunun 23-27-də Strasburqda keçiriləcək. Sessiyada Azərbaycanın Avropa Şurası qarşısında götürdüyü öhdəliklərin yerinə yetirilməsinin vəziyyəti, Ermənistandakı vəziyyət və digər məsələlər müzakirə olunacaq.
Seyidov qeyd edib ki, GUAM ölkələrinin AŞPA-dakı nümayəndə heyətlərinin əsas vəzifəsi təşkilata üzv olan ölkələrin ərazilərində mövcud olan "dondurulmuş münaqişələri" gündəmdə saxlamaqdır.
Məqalə müəllifi ilə əlaqə ünvanı: [email protected]
