Azərbaycan, Bakı, 20 iyun/ Trend , müxbir İ.Əlizadə/ Azərbaycanın müxalifətyönlü Tərəqqi Partiyası hesab edir ki, müxalifət partiyalarının bir qrupunun payızda keçiriləcək prezident seçkisini boykot etməsi onların seçkidə iştirak etmək üçün güclərinin olmaması ilə bağlıdır. "Siyasi partiyaların əsas vəzifəsi seçkidə iştirak edib, əhalinin fəallığını artırmaqdır", - deyə cümə günü Trend -a açıqlamasında Tərəqqi Partiyasının sədri Çingiz Dəmiroğlu bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi partiyasının sədri Qüdrət Həsənquliyevin, Müasir Müsavat partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Hakimiyyətyönlü Ana Vətən və Sosial Rifah partiyaları prezident seçkisində hazırkı dövlət başçısı İlham Əliyevin namizədliyini dəstəkləmək haqda qərar qəbul ediblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Dəmiroğlu qeyd edib ki, müxalifətin bir qrupunun seçkini boykot etməsi, digər hissəsinin isə seçkiyə qatılması nəticələrə təsir göstərməyəcək.
"İki hissəyə parçalanmaq müxalifətin prezident seçkisinin nəticələrinə təsir göstərmək şansını azaldır. Əgər müxalifət hansısa nəticə əldə etmək istəyirsə, ya birlikdə seçkiyə getməli, ya da birlikdə boykot mövqeyi tutmalıdır. Birgə veriləcək istənilən qərarın effektli olması üçün, həmin qərar müxalifətin 80-90 faizini əhatə etməlidir", - deyə partiya sədri əlavə edib.
Onun fikrincə, Seçki Məcəlləsinə və "Sərbəst toplaşmaq azadlığı haqqında" qanuna edilən dəyişikliklərdən sonra boykot tərəfdarlarının arqumentləri daha da güclənib.
Məqalə müəllifi ilə əlaqə ünvanı: [email protected]
