Azərbaycan, Bakı, 08 iyul / Trend , müxbir İ.Əlizadə/ Azərbaycanın hakim partiyası prezident seçkisini boykot edən müxalifət partiyalarını seçkidə iştiraka çağırmaq niyyətində deyil.
"Müxalifətin bir hissəsinin prezident seçkilərini boykot etməsi beynəlxalq təşkilatların seçkinin nəticələrinə verəcəyi qiymətə və Azərbaycanın beynəlxalq imicinə təsir göstərməyəcək", çərşənbə axşamı Trend -a hakim Yeni Azərbaycan Partiyası (YAP) icra katibinin müavini Siyavuş Novruzov bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Sağ mərkəzçi Müsavat Partiyası başqan İsa Qəmbərin namizədliyini irəli sürüb. Azərbaycanın Seçki Məcəlləsi və "Sərbəst toplaşmaq azadlığı haqqında" qanuna əlavə və dəyişikliklər qəbul olunduqdan sonra Müsavat Partiyasınnın rəhbərliyində prezident seçkisində iştirak etməklə bağlı tərəddüd yaranıb. Partiya hesab edir ki, seçki öncəsi vəziyyətdə yeni şərait yaranıb və yeni siyasi şəraitdə hansı addımın atılması ilə bağlı müzakirələr yekunlaşıb.
İndiyə qədər Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları isə seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Novruzov qeyd edib ki, Azərbaycanda azad və demokratik seçkilərin keçirilməsi üçün tam şərait var: "Kim istəyir seçkidə iştirak edə bilər. Müxalifət partiyalarının rəhbərləri yaxşı bilirlər ki, Azərbaycan xalqı onları dəstəkləmir. Ona görə də prezident seçkisini boykot etməklə biabırçı məğlubiyyətdən qaçmaq istəyirlər".
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]