Azərbaycan, Bakı, 10 iyul/ Trend , müxbir E.Babayev/ Azərbaycanda yeni yaradılacaq siyasi partiya ilə bağlı müəyyən təşkilati məsələlər yekunlaşıb. "İndi əsasən siyasi təşkilatın adının müəyyənləşməsi istiqamətində iş gedir. Artıq 3 ad seçilib və onların arasından seçim aparılır", bunu cümə axşamı Trend -a yeni partiyanın yaranması məqsədilə formalaşan 11 nəfərdən ibarət Təşkilat Komitəsinin üzvü Aydın Quliyev deyib.
Trend -un arayışı: Aydın Quliyev Azərbaycanın eks-spikeri Rəsul Quliyevin rəhbərlik etdiyi müxalifətçi Azərbaycan Demokrat Partiyasında təmsil olunub, katib, Ali Məclis üzvü olub. Ötən ilin əvvəlində R.Quliyev və tərəfdarları ADP-dən ayrılaraq Açıq Cəmiyyət Partiyasını yaradıblar. A.Quliyev ACP-nin lideri R.Quliyevin müşaviri olub, ötən ilin sentyabrında bu vəzifəsindən və partiyadan istefa verib.
Quliyev bildirib ki, yaxın günlərdə Təşkilat Komitəsi bir araya gələrək siyasi partiyanın adını müəyyənləşdirmək üçün müzakirələr aparacaq. "Yeni partiyanın siyasi kursu da hələ tam müəyyənləşməyib. Yalnız onu deyə bilərəm ki, siyasi kursumuz radikal olmayacaq", - deyən A.Quliyev bildirib ki, təşkilatın seçkiyə qədər elan olunması planlaşdırılır. O, Təşkilat Komistəsinə yeni üzvlərin daxil olmadığını da bildirib.
Məqalə müəllifi ilə əlaqə ünvanı: [email protected]
