Azərbaycan, Bakı, 25 iyul/ Trend , müxbir E.Babayev/ Azərbaycanın Mərkəzi Seçki Komissiyası (MSK) seçkilərdə beynəlxalq (xarici) müşahidəçilərin fəaliyyət qaydaları haqqında təlimatı təsdiq edib. "Müşahidəçilər seçiciyə necə səs verəcəyi və necə səs verdiyi haqqında sual verə bilməz", - deyə cümə günü Trend -a MSK-dan daxil olan təlimatda deyilir.
Azərbaycanda prezident seçkisinin bu il oktyabrın 15-də keçirilməsi nəzərdə tutulur.
Təlimada müşahidəçilərə hansı digər hərəkətlərin qadağan olunması da yer alıb. Belə ki, müşahidəçilərə seçicilərə bülleten vermək, seçicinin xahişi ilə onun əvəzinə seçki bülleteninin alınması haqqında imza etmək, seçicinin xahişi ilə seçki bülletenini doldurmaq qadağandır. Müşahidəçilərə eyni zamanda, seçki komissiyalarının işinə maneə törədən hərəkətlər etmək, seçicilər arasında təşviqat aparmaq, bu və ya digər namizədin, siyasi partiyanın, siyasi partiyalar blokunun, referenduma çıxarılan məsələnin dəstəklənməsinə yönəldilən və ya dəstəklənməsi kimi qiymətləndirilə bilən çağırışlar etmək qadağan olunub.
"Müşahidəçilər müvafiq seçki komissiyası qərarlarının qəbul olunmasına müdaxilə edə bilməzlər. Bundan başqa, müşahidəçilərə seçicilərin barmaqlarını mürəkkəblə işarələmək və ya ultrabənövşəyi lampa ilə seçicilərin barmaqlarının işarələnib-işarələnmədiyini yoxlamaq, seçicilərin suallarına - öz statusu ilə bağlı suallar istisna olmaqla - cavab vermək qadağandır", - deyə təlimatda deyilir.
Təlimatda müşahidəçilərin hüquqları da göstərilib. Müşahidəçilər seçici siyahıları ilə tanış ola, seçki bülletenlərinin seçicilərə verilməsini müşahidə edə bilərlər. Eyni zamanda, onlar seçicilərin sayını hesablamaq, seçki bülletenlərinin, ləğv edilmiş seçki bülletenlərinin sayılmasını müşahidə etmək, müşahidənin nəticələrinin seçki komissiyasının protokoluna əlavə olnumasını tələb etmək kimi səlahiyyətlərə malikdirlər. Müşahidəçilər səslərin paralel hesablanmasında iştirak etmək hüququndan da istifadə edə bilərlər. Həmçinin müşahidəçilər seçki komissiyaları sənədlərinin, o cümlədən səsvermənin nəticələri və seçkilərin yekunları haqqında protokolların surətlərini əldə edə bilərlər. Müşahidəçilər səsvermənin təşkili ilə bağlı təklif və iradlarını məntəqə seçki komissiyasının sədrinə bildirə bilərlər.
Azərbaycan vətəndaşlarının beynəlxalq müşahidəçi kimi fəaliyyət göstərməsi qadağandır.
Məqalə müəllifi ilə əlaqə ünvanı: [email protected]
