Azərbaycan, Bakı,31 iyul / , müxbir K.Zərbalıyeva/ Bu ilin birinci yarısında prokurorluq orqanlarının 13 əməkdaşı cəzalandırılıb.
Bu barədə cümə axşamı Baş Prokurorluqda ilin 6 ayının yekunlarına həsr olunmuş əməliyyat müşavirəsində məlumat verilib.
Bildirilib ki, həmin əməkdaşlar müxtəlif pozuntulara və qanunsuzluqlara yol verdikləri üçün cəzalandırılıblar. Prokurorluq orqanlarının bir əməkdaşı prokurorluq orqanlarından xaric olunub.
Əvvəlki hesabat dövrü ilə müqayisədə, bu ilin birinci yarısında qeydə alınmış qəsdən adamöldürmə, adam öldürməyə cəhd, qəsdən sağlamlığa ağır zərər vurma, zorlama, hədə- qorxu yolu ilə tələb etmə cinayətlərinin, yol hərəkəti və nəqliyyatın istismarı qaydalarını pozma, o cümlədən ölümlə nəticələnən yol -nəqliyyat hadisələrinin sayı azalıb.
Respublikada qeydə alınmış 10338 cinayətin təxminən 90,4 faizinin açılması təmin edilib.
Daxili işlər orqanları ilə əlaqəli şəkildə həyata keçirilmiş tədbirlər nəticəsində, əvvəlki illərdə Sumqayıt şəhəri, Bakı şəhərinin Nərimanov və Tovuz rayonlarının ərazilərində törədilməklə, uzun müddət bağlı qalan 3 qəsdən adamöldürmə cinayətinin açılması təmin edilib.
2007-ci ilin müvafiq dövrü ilə müqayisədə, hesabat dövründə ölkə üzrə qeydə alınmış ağır və xüsusilə ağır cinayətlərin 25, az ağır cinayətlərin 9,9, adam oğurluğu cinayətləri 2,1 dəfə, oğurluq cinayətləri 41, dələduzluq cinayətləri 20,1, soyğunçuluq və quldurluq cinayətləri, müvafiq olaraq, 66 və 50, yetkinlik yaşına çatmayanlar tərəfindən törədilən cinayətlər 30,3, insan alveri ilə bağlı cinayətlər 76,8 faiz artıb.
Hesabat dövrü ərzində 8 qəsdən adam öldürmə hadisəsinin, o cümlədən, Gəncə və Şirvan şəhərlərində, Bakı şəhərinin Nəsimi rayonunda, Abşeron, Yardımlı, Goranboy, Lənkəran və Qəbələ rayonlarının hər birində 1 belə cinayət bağlı qalıb.
Müəlliflə əlaqə saxlamaq üçün elektron ünvan - [email protected]
