Azərbaycan, Bakı, 11 avqust / Trend , müxbir E.Babayev/ Azərbaycanın müxalif Müsavat Partiyası irimiqyaslı aksiyalar keçirmək niyyətindədir. "Avqust ayında Müsavatın bir neçə piket keçirməsi gözləniləndir. Bununla yanaşı, biz irimiqyaslı aksiyalar da keçirmək barədə düşünürük",- bazar ertəsi Trend -a Müsavat Divanının iclasından sonra partiyanın funksioneri Qabil Hüseynli bildirib.
Hüseynli vurğulayıb ki, Müsavat irimiqyaslı aksiyaların digər müxalif partiyalarla birgə baş tutmasında maraqlıdır. Aksiyalarda sərbəst toplaşmaq azadlığının təmin olunması, jurnalistlərin azadlığa buraxılması kimi tələblər səsləndiriləcək.
Azərbaycanda 3 jurnalist həbsdədir.
Hüseynli onu da bildirib ki, Divanın iclasında Gürcüstandakı vəziyyət müzakirə olunub və Cənubi Osetiyadakı hərbi əməliyyatlarla bağlı bəyanat qəbul edilib. Müsavatın Gənclər Təşkilatının bu gün Rusiyanın Bakıdakı səfirliyi qarşısında keçirdiyi aksiyanın dağıdılması da pislənilib.
Müsavat Partiyası 1911 - ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992 - ci il noyabrın 7 - də Bakıda Respublika sarayında keçirilib. Gizli səsvermənin yekunları əsasında Qəmbər əksəriyyət səslə Müsavat Partiyasının başqanı seçilib.
Qəmbər Azərbaycan parlamentinin spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya 4 nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]