Azərbaycan, Bakı, 25 avqust / Trend , müxbir E.Babayev/ Azərbaycanın müxalif Böyük Quruluş Partiyasının (BQP) prezidentliyə namizədi seçkidə iştirakdan imtina edən əsas müxalifət partiyalarının elektoratının səsini qazanacağına ümid edir.
"Seçkidə iştirak etməyən müxalifət partiyalarının elektoratının səsini qazanmaq istiqamətində mənim ciddi addımlarım olacaq", bazar ertəsi Trend -a BQP başqanı, millət vəkili Fazil Qəzənfəroğlu bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Azadlıq, Milli İstiqlal, Sosial Demokrat partiyaları, o cümlədən "Azərbaycan Naminə" İctimai Forumun rəhbəri Eldar Namazov seçkidə iştirakdan imtina ediblər.
İndiyə qədər prezident seçkilərinə 18 iddiaçı qoşulub. Onlardan 7-sı siyasi partiyaların təmsilçiləridir. Bunlar hakim Yeni Azərbaycan Partiyasının namizədi İlham Əliyev, Böyük Quruluş Partiyasının sədri Fazil Qəzənfəroğlu, Ümid Partiyasının sədri İqbal Ağazadə, Müasir Müsavat Partiyasının sədri Hafiz Hacıyev, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Liberal-Demokrat Partiyasının sədri Fuad Əliyev və Yaşıllar Partiyasının sədri Mais Güləliyevdir.
Qəzənfəroğlu deyib ki, müxalifətin bir hissəsinin seçkidə iştirak etməməsi seçki prosesinə ciddi təsir göstərməyəcək. "Bizim prosesdə iştirakımız seçkini daha fəal bir prosesə çevirəcək. Mən buna əminəm və seçki prosesinin gedişində şahid olacaqsınız ki, əksər müxalifət elektoratı da seçkidə ən fəal mövqe tutacaq", - deyən BQP sədri əlavə edib ki, artıq namizədliyinin qeydə alınması üçün tələb olunan ən azı 40 min imzanın toplanılmasına başlanılıb. Onun sözlərinə görə, hələlik bu sahədə hər hansı problem yoxdur.
"Mənim hələlik blok yaratmaq niyyətim yoxdur. Bununla belə, BQP-nin təmsil olunduğu Demokratik Seçki Mərkəzi ilə məsləhətləşmələrimiz aparılacaq və bundan sonra blokla bağlı addımlarımız dəqiqləşəcək. Mən bu qurumdakı partiyaların dəstəyini almaq niyyətindəyəm", - deyən millət vəkili özünün seçki qərargahını da formalaşdırdığını bildirib. "Seçki qərargahı tam formalaşıb və qərargaha partiyamızın funksioneri Əjdər Əliyev rəhbərlik edir", - deyə o qeyd edib.
Müxalifətyönlü BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın başqanı Qəzənfəroğlu Milli Məclisin deputatıdır.
Məqalə müəllifi ilə əlaqə ünvanı: [email protected]
