Azərbayan, Bakı, 03 oktyabr/ Trend , müxbir İ.Əlizadə/ Azərbaycanda keçiriləcək prezident seçkisini boykot edən təşkilatların təmsil olunduğu Müxalifətin Əməkdaşlıq Mərkəzi icazəsiz kütləvi etiraz aksiyalarının keçirilməsi məsələsini müzakirə edir.
"Bakı Şəhər İcra hakimiyyəti aksiyalara icazə vermədiyinə görə, müxalifət icazəsiz aksiyalar keçirə bilər və biz bu haqda düşünürük" - cümə günü Trend -a Müxalifətin Əməkdaşlıq Mərkəzinin həmsədri, Milli Birlik Hərəkatının lideri Lalə Şövkət bildirib.
Trend - un arayışı: Azərbaycanda prezident seçkisi oktyabrın 15-də keçiriləcək. Sentyabrın əvvəlində "Azadlıq" blokuna daxil olan partiyalar - Xalq Cəbhəsi, Liberal Partiya, Vətəndaş və İnkişaf partiyası, Müsavat Partiyası və "Azərbaycan Naminə" İctimai Forum prezident seçkisinin nəticələrini tanımamaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Bəyanatı imzalamış siyasi təşkilatlar sentyabrın 28 - də Bakının mərkəzi meydanlarının birində mitinq keçirməyə qərar vermişdilər. Mitinq üçün yer ayrılması ilə bağlı siyasi təşkilatlar Bakı Şəhər İcra Hakimiyyətinə müraciət ediblər. Müraciətdə aksiyanın 9 meydandan birində keçirilməsinə razılıq verilməsi xahiş olunurdu. Bakı Şəhər İcra Hakimiyyəti aksiyanın şəhərdən kənarda -"Neftçi" İdman -Sağlamlıq Mərkəzinin Bibheybətdəki stadionunda keçirilməsinə icazə verib. Müxalifət bununla razılaşmayıb və aksiya təxirə salınıb.
"Azadlıq" bloku son iki ildə bir necə icazəsiz piket keçirib. Təəssüflər olsun ki, hər piketdə 50 - 70 nəfər şəxs həbs olunub. Lakin buna baxmayaraq, belə bir qənaətə gəlmişik ki, icazəsiz aksiyalar davam etdirilsin", -deyə müxalifət lideri əlavə edib.
Şövkət Mərkəzin real fəfliyyət göstərməməsi ilə bağlı fikirləri qəbul etmir. O bildirib ki, Mərkəz İctimai Televiziyada müxalifətə efir vaxtı, etiraz aksiyalarının keçirilməsi üçün şəhərin mərkəzində yer ayrılması ilə bağlı, Bakı Şəhər İcra Hakimiyyətinə müraciətlər edib.
"Lakin bu müraciətlərimizin heç birinə müsbət cavab verilmədi. Müxalifətin Əməkdaşlıq Mərkəzi fəaliyyətini davam edirir. Təəssüflər olsun ki, hakimiyyət yenə də heç bir demokratik addım atmaq istəmir. Bu gün hər tərəfdə müxalif siyasi partiyaların fəaliyyətinə mane olur".
Onun sözlərinə görə, müxalifət partiyaları strateji məqsədlər və taktiki məsələlərə nail olmaqla bağlı müzakirə aparırlar.
"Yaxın zamanlarda cəmiyyət müxalifətin daha güclü fəaliyyətinin şahidi olacaq", - deyə Şövkət əlavə edib.
Müxalifət lideri hesab edir ki, müxalifətin prezident seçkisini boykot etməsi taktikası müsbət nəticə verir və bu addımının səhv olmadığı təsdiqlənib.
Hakim Yeni Azərbaycan Partiyasının (YAP) icraçı katibinin müavini Siyavuş Novruzov isə, Trend - a bildirib ki, prezident seçkisi azad, demokratik və şəffaf keçiriləcək. "Bunun üçün hər cür şərait yaradılıb. ATƏT, Avropa Şurası və digər beynəlxalq təşkilatlar bəyan ediblər ki, Azərbaycanın Seçki Məcəlləsi azad, demokratik və şəffaf seçkilər keçirməyə imkan verir", - deyə o əlavə edib. Novruzovun fikrincə, müxalifət prezident seçkisində iştirak edəcəyi halda, ağır və biabırçı məğlubiyyətlə üzləşəcəyini yaxşı bilir. O vurğulayıb ki, müxalifətin sosial bazası yoxdur.
Məqalə müəllifi ilə əlaqə ünvanı: [email protected]