Azərbaycan, Bakı, 04 noyabr / Trend müxbir, C.Babayeva/ Müxalif Azərbaycan Milli Demokrat Partiyası (AMDP) qarşıdan gələn bələdiyyə və parlament seçkilərinə blok şəklində qatılmağı düşünür.
"Demokratiya Uğrunda İttifaq çərçivəsində əməkdaşlıq etdiyimiz qüvvələrlə mövqeyimiz qarşıdan gələn seçkilər ərəfəsində tam üst-üstə düşərsə, ortaq baxışlarımız olarsa, partiyanın blok şəklində seçkilərə qatılması barədə qərar qəbul oluna bilər", - DUİ-də təmsil olunan Azərbaycan Milli Demokrat Partiyasının sədri Tufan Kərimli çərşənbə axşamı Trend -a bildirib.
Trend -un arayışı: Demokratiya Uğrunda İttifaqda Klassik Xalq Cəbhəsi Partiyası, Azadlıq Partiyası və Azərbaycan Milli Demokrat Partiyasıı təmsil olunur. İttifaq bu partiyaların məşvərət və əməkdaşlıq qurumudur.
Klassik Xalq Cəbhəsi Partiyasının sədri Mirmahmud Mirəlioğlu DUİ-nin bələdiyyə seçkisinə blok şəklində qatılmasının müzakirə mövzusu olduğunu bildirib.
DUİ-nin bloka çevrilməsi ilə bağlı müzakirələrin aparıldığına gəlincə, Kərimli bu məsələ ilə bağlı ilkin ehtimallar olsa da, konkret müzakirələrin aparılmadığını bildirib.
Trend -un arayışı: AMDP 1993-cü ildə yaradılıb və ilk adı "Boz Qurd" olub. 1994-cü ildə Ədliyyə Nazirliyində dövlət qeydiyyatına alınıb. 1995-ci ildə Ali Məhkəmə partiyanın adının müvafiq olmadığını əsas gətirərək, "Boz Qurd"un dövlət qeydiyyatını ləğv edib. Partiya qeydiyyat problemini həll etmək üçün 1999-cu ildə keçirdiyi ikinci qurultayında adını dəyişib və Milli Demokrat Partiyası adlandırılıb. Lakin Ədliyyə Nazirliyi partiyanı qeydiyyata almaqdan imtina edir. Partiyanın keçmiş sədri, sabiq daxili işlər naziri İsgəndər Həmidov 1995-2004-cü illərdə həbsdə olub. 15 il azadlıqdan məhrum edilən Həmidov 2004-cü ildə prezidentin əfv fərmanı ilə azadlığa çıxıb.
Bu ilin aprelində Həmidov partiya sədrliyindən istefa verib. O, istefasını partiyada sədrliyə layiq şəxslərin olması və onlara yol açmaq istəməsi ilə izah edib. AMDP-nin nöbvbədəkənar IV qurultayında Böyük Məclis sədri Tufan Kərimli partiyanın sədri seçilib.
Məqalə müəllifi ilə əlaqə saxlamaq üçün ünvan: [email protected]
