Azərbaycan, Bakı 21 aprel / Trend , müxbir C.Babayeva /
Azərbaycanın müxalifyönlü Müasir Müsavat Partiyası (MMP) radikal müxalifətin bələdiyyə seçkisinə birlik formasında qatılacağını real hesab etmir.
"Radikal müxalifətin nümayəndələrinin seçkilərlə bağlı bu günə qədər yaratdıqları birliklərin heç bir perspektivi olmayıb. Onlar bələdiyyə və parlament seçkilərinə birlik halında qatılsalar belə, uğur qazanmayacaqlar", - çərşənbə axşamı Trend -a Müasir Müsavat Partiyasının sədri Hafiz Hacıyev bildirib.
Trend -un arayışı: "Qarabağ və Respublika Uğrunda Hərəkat"da təmsil olunan Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları bələdiyyə seçkilərində birgə iştirak etmək barədə ilkin qərar veriblər. Azərbaycanda bələdiyyə seçkiləri bu ilin sonunda keçiriləcək.
Hacıyev bildirib ki, sədri olduğu partiya bələdiyyə seçkilərinə hazırlığa artıq start verib. "Partiyanın rayon və şəhər təşkilatlarından bələdiyyə seçkilərinə irəli sürüləcək namizədlərin siyahısı dəqiqləşdirilir. Müasir Müsavat Partiyası Siyasi Şurasının qərarına əsasən, partiya bələdiyyə seçkisinə blok şəklində deyil, təkbaşına qatılacaq. Bələdiyyə seçkilərində qalib gələndən sonra güclü dayaqlarla parlament seçkilərində iştirak edəcəyik", - MMP sədri deyib.
Trend -un arayışı: Hafiz Hacıyev 1992-93-cü illərdə "Azərbalıq" Dövlət Konserninin sədri olub. Əvvəl Azərbaycan Xalq Cəbhəsində, Müsavat Partiyasında təmsil olunub. 2000-ci ildə Müasir Müsavat Partiyasını təsis edib, partiya 2002-ci ildə dövlət qeydiyyatından keçib. Ötən il keçirilən prezident seçkisində Hacıyev 0,65 faiz səs toplayıb.
Müasir Müsavat Partiyası özünü iqtidara qarşı konstruktiv müxalifət hesab edir.
Məqalə müəllifi ilə əlaqə ünvanı: [email protected]
