Son məlumatlara görə, hazırkı Qırğızıstan Prezidenti Kurmanbek Bakiyevə seçkilərdə 1 milyon 380 min 79 nəfər (85,92 faiz) səs verib. Bu barədə Qırğızıstanın Seçkilər və Referendum üzrə Mərkəzi Komissiyası xəbər verir. Məlumatı "24.kg" informasiya agentliyi yayıb.
Qeyd edilir ki, 15.00-a qədər 1 635 məntəqədə (70,17 faiz) səsvermənin nəticələri hesablanıb. Ümumilikdə, Qırğızıstan və ondan kənarda seçkilərin keçirilməsi üçün 2 330 seçki məntəqəsi açılıb.
Qırğızıstan MSK-nın məlumatına görə, seçkilərdə ikinci yeri müxalifətin vahid namizədi, Sosial Demokrat Partiyasının lideri Almazbek Atambayev tutur - 7,43 faiz səs. Sonra gələnlər: "Ak-Şumkar" partiyasının lideri Temir Sariyev (2,59 faiz), həkim Jenişbek Nazaraliyev (0,5 faiz), QHT və QKT Koalisiyasının rəhbəri Toktayım Umetaliyeva (0,39 faiz) və "Joomart" hərəkatının lideri Nurlan Motuyev (0,31 faiz səs).
MSK-nın məlumatına görə, "hamısına yox" deyən seçicilərin sayı 1,94 faiz olub.
MSK-dan qeyd olunur ki, seçkilərdə ümumilikdə, respublikada qeydiyyatdan keçmiş 79,38 faiz (2 milyon 301 min 292 nəfər) seçici iştirak edib. Bu məlumatlar hələ dəqiqləşdirilir, ancaq böyük dəyişiklik gözlənilmir.