Azərbaycan, Bakı, 29 iyul / Trend , müxbir A.Hüseynbala /
Azərbaycanın bir qrup müxalifət partiyasının təmsil olunduğu ittifaq birgə aksiyaların keçirilməsi üçün digər müxalifət qüvvələri ilə müzakirələr aparacaq.
"İşçi qrupunun iclasında digər siyasi təşkilatlarla danışıqlar aparmaq üçün nümayəndələr müəyyənləşdirilib", - çərşənbə günü Trend -a Demokratiya Uğrunda İttifaqda (DUİ) təmsil olunan Azadlıq Partiyasının sədri Əhməd Oruc bildirib.
Trend -un arayışı: İki Cənubi Qafqaz ölkəsi arasında münaqişə 1988-ci ildə Еrmənistanın Azərbaycana qarşı ərazi iddiası irəli sürməsi zəminində yaranıb. 1991-ci ilin dekabrında, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-1993-cü illərdə Şuşa, Xocalı və Dağlıq Qarabağa bitişik yeddi rayon işğal olunub. 1994-cü ilin mayında tərəflər atəşkəs rеjiminə dair razılaşma əldə еdiblər və о vaхtdan bəri, ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Orucun sözlərinə görə, kütləvi aksiyaların təşkilində əsas məqsəd ATƏT-in Minsk qrupu həmsədrlərinin Dağlıq Qarabağ münaqişəsinin nizamlanması ilə bağlı hazırladıqları Madrid prinsiplərində Azərbaycanın əleyhinə olan müddəalara etiraz etməkdir. "Biz təkcə ictimai-siyasi təşkilatların yox, tanınmış ziyalıların da etiraz etmələrini istəyirik. Bu səbəbdən ittifaq adından Yazıçılar Birliyinə də müraciət edəcəyik", - partiya sədri əlavə edib.
Azadlıq Partiyasının rəhbəri deyib ki, etiraz aksiyalarının keçiriləcəyi vaxt dəqiqləşdirilməyib. "Biz aksiyaların vaxtını partiyalarla müzakirələrdən sonra müəyyənləşdirəcəyik", - Oruc vurğulayıb.
Trend -un arayışı: Demokratiya Uğrunda İttifaq 2005-ci il parlament seçkisindən sonra yaradılıb. İttifaqda Klassik Xalq Cəbhəsi, Azadlıq, Milli Demokrat, Böyük Azərbaycan və Xalq partiyaları təmsil olunur.
Məqalə müəllifi ilə əlaqə ünvanı: [email protected]
