Azərbaycan, Bakı, 28 iyun /Trend, müxbir S.Süleymanov/
Azərbaycanın nümayəndə heyəti ATƏT-in tolerantlıq və hüquq bərabərliyi üzrə yüksək səviyyəli konfransında iştirak edəcək. Konfrans çərşənbə günü Astanada keçiriləcək. Bu barədə Trend-ə Azərbaycanın Qazaxıstandakı səfirliyinin nümayəndəsi bildirib.
"Nümayəndə heyəti dörd nəfərdən ibarətdir. Ona Azərbaycanın Dini Qurumlarla İş üzrə Dövlət Komitəsinin sədri Hidayət Orucov başçılıq edir", - səfirlik nümayəndəsi deyib.
Nümayəndə heyətinə Azərbaycan Xarici İşlər Nazirliyinin nümayəndəsi Əlimirzamin Əsgərov və Azərbaycan QHT-nin rəhbəri Gülsel Səfərova da daxildir.
Qazaxıstan Xarici İşlər Nazirliyinin məlumatına əsasən, iyunun 29-30-da Astanada ATƏT-in iştirakçı ölkə və tərəfdaşlarının dövlət orqanların rəhbərlərinin iştirakı ilə ATƏT-in tolerantlıq və hüquq bərabərliyi üzrə yüksək səviyyəli konfransı keçiriləcək.
Konfrans Astanada "Piramida" sülh və həmrəylik sarayında keçiriləcək.
