Azərbaycan, Bakı, 7 noyabr /Trend, müxbir E.Tariverdiyeva/
Azərbaycanda seçki məntəqələri ən yüksək tələblərə cavab verir. "Qafqaz xəbərləri" Analitik İnformasiya Agentliyinin müşahidəçisi, Rusiya Dövlət Humanitar Universiteti yanında Qafqazşünaslıq Mərkəzinin rəhbəri, Trend-in Ekspertlər Şurasının üzvü İsmayıl Ağakişiyev belə hesab edir.
Onun sözlərinə görə, dörd seçki məntəqəsinə baş çəkdikdən sonra agentliyin missiyası seçkilərdə xoş ab-havanın olduğunu qeyd edib.
"Əhali səs vermək istəyir, fəallıq yüksəkdir, bir çox məntəqələrdə "exit-poll" aparılır. Ümumilikdə, insanların sakit şəkildə səsverməsi üçün hər şey edilib", - Ağakişiyev deyib.
Azərbaycanda parlament seçkisi ilə bağlı səsvermə yerli vaxtla saat 08:00-da başlayıb.
MSK-nın rəsmi məlumatına görə, parlament seçkilərində 690 namizəd mübarizə aparır.
Azərbaycanda parlament seçkiləri majoritar sistem üzrə 125 seçki dairəsində aparılır. Bundan əvvəlki seçkilər 2005-ci ilin noyabr ayında keçirilib.