Azərbaycan, Bakı, 2 fevral /Trend, müxbir M.Əliyev/
Azərbaycanın Vətəndaş və İnkişaf Partiyasının (VİP) sədri Əli Əliyev çərşənbə günü Avropa Şurası Parlament Assambleyası (AŞPA) Monitorinq Komitəsinin Azərbaycan üzrə həmməruzəçiləri Jozef Debono Qrex və Pedro Aqramunt ilə görüşüb. Görüşdə əsasən Azərbaycanda 7 noyabr 2010-cu ildə keçirilmiş parlament seçkiləri, ölkədəki demokratiya ilə bağlı durum və sosial-iqtisadi məsələlər müzakirə olunub.
Əliyev AŞPA Monitorinq Komitəsinin Azərbaycan üzrə məruzəçilərinin təyinatı zamanı varislik prinsipinin gözlənilməməsinin və hər yeni təyin olunan məruzəçilərin fəaliyyətə sıfır nöqtəsindən başlamalarının düzgün yanaşma olmadığını qeyd edib.
AŞPA-nın Azərbaycan üzrə həmməruzəçiləri ünvanlarına səsləndirilən iradları nəzərə alacaqlarını, yaxın günlərdə keçirəcəkləri mətbuat konfransında əldə etdikləri məlumatlar və müşahidələrinə əsaslanan fikirlərini bölüşəcəklərini bildiriblər.
