...

Azərbaycan Ermənistana silah satışı ilə bağlı Rusiyaya nota verib (ƏLAVƏ OLUNUB)

Siyasət Materials 24 Fevral 2016 14:28
Azərbaycan Ermənistana silah satışı ilə əlaqədar Rusiyaya nota təqdim edib.
Azərbaycan Ermənistana silah satışı ilə bağlı Rusiyaya nota verib (ƏLAVƏ OLUNUB)

Trend-i buradan izləyin

Bakı. Səba Ağayeva - Trend:

Azərbaycan Ermənistana silah satışı ilə əlaqədar Rusiyaya nota təqdim edib. Trend-in məlumatına görə, bunu Azərbaycan Xarici İşlər Nazirliyinin (XİN) rəsmi nümayəndəsi Hikmət Hacıyev deyib.

H.Hacıyev bildirib: "Kütləvi informasiya vasitələrində Rusiya tərəfindən Ermənistana silah və hərbi texnikanın alınmasını nəzərdə tutan 200 milyon ABŞ dolları dəyərində kredit sazişinin 10 fevral 2016-cı il tarixində qüvvəyə minməsi barədə məlumat verilmişdi. Məsələ ilə əlaqədar Azərbaycan Xarici İşlər Nazirliyi tərəfindən Rusiya XİN-ə nota ünvanlanıb".

XİN rəsmisi deyib ki, Azərbaycan tərəfindən dəfələrlə Ermənistanın əldə etdiyi hərbi texnika və sursatı, o cümlədən hücum silahlarını Azərbaycanın işğal olunmuş ərazilərində cəmləşdirməsi barədə təkzibolunmaz faktlar beynəlxalq ictimaiyyətin diqqətinə çatdırılıb: "İxrac edən dövlətin razılığı olmadan son istifadəçi kimi əldə etdiyi silah və sursatı Azərbaycanın işğal olunmuş ərazilərinə yerləşdirməklə, Ermənistan öz üzərinə düşən beynəlxalq hüquqi öhdəliklərini və silahlara nəzarət üzrə müvafiq rejimləri və şəffaflığı ciddi şəkildə pozur. Ermənistanın Azərbaycan ərazilərinin işğalını davam etdirməsi və işğal edilmiş ərazilərdə öz hərbi mövcudluğunu möhkəmləndirməsi şəraitində Ermənistana xüsusilə hücum xarakterli silah və hərbi texnikanın verilməsi münaqişənin həllinə xidmət etmir, əksinə, Azərbaycan ərazilərinin işğalının davam etməsinə və gərginliyin artmasına rəvac verir".

H.Hacıyev vurğulayıb ki, Ermənistana bu kimi hücum xarakterli silah və texnikanın verilməsi Azərbaycan ictimaiyyəti tərəfindən də ciddi neqativ reaksiya ilə qarşılanır: "Azərbaycan tərəfi son istifadəçi şəhadətnaməsinə uyğun olaraq, ixracatçı tərəfin bu silah və hərbi texnikanın Ermənistan tərəfindən Azərbaycanın işğal olunmuş əraziləri və Ermənistan-Azərbaycan sərhədi boyunca yerləşdirilməyəcəyinə dair zəmanətin veriləcəyini gözləyir".

Məqalədə:
Xəbər lenti

Xəbər lenti