Bakı. Trend:
Ermənistanın üçtərəfli bəyanatla bağlı destruktiv addımları qəbuledilməzdir.
Trend-in xəbərinə görə, bunu xarici işlər naziri Ceyhun Bayramov bu gün ADA Universitetində Ağdam Beynəlxalq Konfransı çərçivəsində çıxışından sonra jurnalistlərə açıqlamasında deyib.
Onun sözlərinə görə, Ermənistanın bu addımları post-münaqişə dövründə münasibətlərin normallaşmasına vurulan ən ciddi zərbədir.
“Üçtərəfli bəyanatın fundamental prinsipləri pozulur. Həmin prinsiplər sırasında bütün erməni hərbi birləşmələrinin Azərbaycan ərazisindən çıxarılması öhdəliyi hələ də yerinə yetrilmir”, - deyə C.Bayramov əlavə edib.
Nazirin sözlərinə görə, avqust ayından bəri Azərbaycan ərazilərində 2700-ə yaxın Ermənistan istehsalı minalar aşkar olunub ki, bu minalar da 2021-ci ildə istehsal olunub.
XİN rəhbəri vurğulayıb ki, bununla bağlı lazımi beynəlxalq qurumlar məlumatlandırılıb.