Bakı. Trend:
"Euronews" telekanalı XII Qlobal Bakı Forumunun yekunlarına dair reportaj hazırlayıb.
Trend xəbər verir ki, “Focus” proqramının son buraxılışında kanal 50-dən çox dünya liderləri və ekspertlərinin Azərbaycanda keçirilən görüşü barədə məlumat verib və burada dəyişən geosiyasi vəziyyət fonunda qlobal təhlükəsizlik, Aİ-yə inteqrasiya və münaqişədən sonrakı bərpa məsələlərini müzakirə ediblər.
Forum “Dünya düzəninin yenidən düşünülməsi: çağırışların fürsətə çevrilməsi” mövzusu altında aktual qlobal problemləri müzakirə etmək üçün ölkələrin yüksək səviyyəli nümayəndələrini və siyasətçiləri bir araya toplayıb.
Əsas diqqət Aİ-nin genişlənməsi, Cənubi Qafqazda regional təhlükəsizlik və münaqişədən sonrakı dövrdə sabitliyin təmin edilməsinə yönəldilib. Liderlər beynəlxalq əməkdaşlığın gücləndirilməsinin vacibliyini vurğulayıblar. Bundan əlavə, Albaniya Avropaya inteqrasiyaya sadiqliyini bir daha təsdiqləyib və ekspertlər Qərbi Balkanlarda sabitliyin kritik əhəmiyyətini qeyd ediblər.