Gəncədə "Səhmdarlara və investorlara hüquqi yardım" adlı seminar keçirilib. Trendin Qərb bürosunun məlumatına görə, tədbirdə Gəncədən 40-dan çox iş adamı iştirak edib.
Seminarın təşkilatçıları Bakı Fond Birjası və "Şəffavlıq Azərbaycan" təşkilatıdır. Qlobal İmkanlar Fondu və Böyük Britaniyanın ölkəmizdəki səfirliyi tərəfindən maliyyələşdirilən "Korporativ idarəetmə Azərbaycan biznesinə çağırış kimi" layihəsi çərçivəsində baş tutub.
Bakı Fond Birjasının vitse-prezidenti Mustafa Məmmədov iştirakçıların nəzərinə çatdırıb ki, bu il qiymətli kağızlar bazarının dövriyyəsi 1 miyard ABŞ dollarından çoxdur. Halbuki ötən il bu rəqəm 600 min dollar olub. 2006-cı ildə dövriyyənin əksəriyyətinin dövlətin qiymətli kağızlar üzrə həyata keçirdiyi əməliyyatların, 10-15 faizi isə korporativ sektorun payına düşüb . M.Məmmədov bu sahənin inkişaf etdirlməsi üçün səhmdarların maarifləndirlməsinə ehtiyac olduğunu qeyd etdi.
Seminarda səhmdar cəmiyyətlərdə idarəetmə, səhmdarların hüquqlarının qorunması, açıq bazarın müqayisəli üstünlükləri, birja bazarına çıxmağın yolları kimi mövzular müzakirə olundu. Mustafa Məmmədov bildirdi ki, Azərbaycanda aparılan özəlləşdirmə prosesinin nəticəsi olaraq, 100 minlərlə səhmdar mövcuddur. "Azərbaycanda kiçik pay sahibi olan səhimdarların hüquqlarının böyük həcmdə səhmləri olan həmkarları tərəfindən pozulması hallarına tez-tez rast gəlinir. Bu səbəbdən hər bir səhmdarın öz hüquqlarını bilməsi çox vacibdir"
Gəncədən sonra digər regionlarda da bu kimi görüşlərin təşkil olunacağı nəzərdə tutulur.
