2006-cı ildə Gəncə şəhərində 123 nəfər vərəmə tutulub. Trendin Qərb Bürosuna bu barədə məlumat verən Gəncə Regional Vərəm Dispanserinin baş həkimi Əli Rüstəmovun sözlərinə görə, bu göstərici ötən ilə nisbətən 11 nəfər çoxdur.
Müsahibin sözlərinə görə, vərəmə tutulan xəstələrdən 97 nəfərinə ağ ciyər vərəmi, 26 nəfərinə isə digər orqanların vərəmi diaqnozu qoyulub. Baş həkim xəstələrdən 35-də BK+ (yəni infeksiyanın ağır forması), 48-də dağılma fazasının mövcud olduğunu bildirdi.
Ə. Rüstəmov əlavə etdi ki, 2006-cı ildə bu xəstəlikdən 19 nəfər dünyasını dəyişib. Bu müddətdə ordudan qayıdan gənclərdən 4-də, həbsdən azad olunanların isə 11-də vərəm aşkar olunub. Ötən il vərəmə tutulanlardan 123 nəfərindən 100-nün yetkin yaşlı, 10-nun yeniyetmə, 13 nəfərinin isə uşaqlar olduğu bildirilir.