Müsavat Partiyası artıq siyasi xarakterli aksiyalara başlacaq
Azərbaycan, Bakı / Trend müxbir S.İlhamqızı/ Müxalifəti təmsil edən Müsavat Partiyası payız mövsümündən artıq siyasi xarakterli kütləvi aksiyalara başlayacaq. Bu barədə partiyanın Məclis sədri Sülhəddin Əkbər məlumat verib.
Qeyd edək ki, Müsavat Partiyası Azərbaycanda enerjidaşıyıcıların, kommunal xidmətlərin qiymətinin bahalaşmasına etiraz olaraq bu ilin əvvəlində silsilə yürüş-mitinqlər keçirib. Hazırda bu aksiyalara fasilə verilib.
Sülhəddin Əkbər bildirib ki, kütləvi aksiyaların keçirilməsi demokratiyanın tərkib hissəsidir. Ona görə də Müsavat Partiyası kütləvi aksiyalarını bərpa edəcək. Amma bu dəfə artıq sosial tələblərlə deyil, siyasi tələblərlə aksiyalara başlanılacaq: "Gələcəkdə yenə də sosial problemlər aktuallaşa bilər və o zaman biz bu məsələlərə yenə də toxunacağıq. Amma bu ilin payızında aktiv siyasi dövr başlayacaq və demək olar ki, prezident seçkiləri kampaniyasına qeyri-rəsmi start veriləcək. Ona görə də Müsavat Partiyasının payızda keçirəcəyi kütləvi aksiyalar artıq siyasi xarakter daşıyacaq. Bu aksiyaların harada, hansı marşrutlar üzrə keçirilməsi məsələsini isə biz yenidən müzakirə etməli olacağıq"-deyə Müsavatın Məclis sədri qeyd edib.
O həmçinin qeyd edib ki, Müsavat Partiyası gələn il keçiriləcək prezident seçkisində iştirak etmək niyyətindədir.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş deputatla parlamentdə təmsil olunur.
