Azərbaycan, Bakı, 21 yanvar / Trend , müxbir E.Hüseynli/ Azərbaycan Ekologiya və Təbii
Sərvətlər Nazirliyi (ETSN) Sumqayıt şəhəri, Qobustan, Abşeron, və Xızı rayonlarında külli miqdarda yaş ağacların kəsilməsini aşkarlayıb. Nazirliyin mətbuat xidmətindən bazar ertəsi Trend ə bildiriblər ki, aparılan araşdırmalar nəticəsində Sumqayıtın 2, 3 və 12-ci mikrorayonlar, həmçinin "Nəsimi" adına dənizkənarı parkda yaşköküstə ağacların kəsilməsi faktları aşkarlanıb. Abşeron rayonu Bakı-Sumqayıt yolunun 16-cı km-də, yolkənarı yaşıllıq zolaqda 43 ədəd müxtəlif cinsli ağacların kəsilməsi faktı aşkarlanıb. Cavabdehi tapmaq mümkün olmadığından, tərtib edilmiş sənədlər Abşeron rayon Polis Şöbəsinə təqdim olunub.
Xırdalan şəhəri, 28-ci məhəllə ərazisində də yaşıllıq sahənin hasara alınması, ağacların kəsilməsi faktı aşkarlanıb və cavabdehi tapmaq mümkün olmadığından, tərtib edilmiş sənədlər Abşeron rayon Polis Şöbəsinə təqdim olunub.
Ötən il ərzində nazirlik tərəfindən aparılan araşdırmalar, monitorinq və reydlər nəticəsində Sumqayıt şəhəri, Qobustan, Abşeron, və Xızı rayonlarında təbiətə vurulan ziyana görə, 243 akt, 112 protokol tərtib olunub, su hövzələrindən 1332, atmosfer havasından 149 analiz götürülərək təhlil edilib. Ətraf mühitə vurulan ziyan müqabilində cavabdeh müəssisələrə və ayrı-ayrı fiziki şəxslərə qarşı 111606 manat iddia, 9134 manat ödəmə tələbi qaldırılıb, ekoloji qaydaların pozulmasına görə 36 nəfər cavabdeh şəxs 5903 manat məbləğində inzibati qaydada cərimələnib, onlara icra üçün konkret tələblərdən ibarət 66 "məcburi göstəriş" verilib. Tədbir görülmək üçün hüquq-mühafizə orqanlarına 9, məhkəmə nəzarətçilərinə və məhkəmə icraçılarına 14 iş göndərilib.
