Azərbaycan, Bakı, 22 oktyabr / Trend , müxbir K.Zərbalıyeva/ Azərbaycanda çoxsaylı qətllər, silahlı basqınlar törətmiş qanunsuz silahlı quruplaşma üzvünün məhkəməsi başlayıb.
Ağır Cinayətlərə Dair İşlər üzrə Məhkəmədə çərşənbə günü keçirilən prosesdə Gürcüstan vətəndaşı Fizuli Məmmədov ifadə verib və həmkəndlisi Vahid Hümbətovun qətlində özünü təqsirli bilməyib.
Məmmədov 1991-ci ildə üzvü olduğu dəstənin rəhbəri Muxdət Ömərovun sifarişi ilə Hümbətovu odlu silahla qətlə yetirməkdə ittiham olunur.
Cinayət Məcəlləsinin qəsdən adam öldürmə, qanunsuz odlu silah saxlama, qanunsuz silahlı birləşmə yaratma və orda iştirak etmə maddələri ilə təqsirləndirilən Məmmədov bu ilin martında həbs olunub.
Təqsirləndirilən ifadəsində Ömərovun rəhbərlik etdiyi dəstənin üzvü olduğunu etiraf etsə də, həmkəndlisinin qətlində iştirakı olmadığını deyib.
Ömərovun rəhbərlik etdiyi silahlı dəstənin üzvləri qəsdən adam öldürmə, sifarişli qətllər, silahlı basqınlarda təqsirli bilinərək 2003-cü ildə məhkum olunublar.
Müəlliflə əlaqə saxlamaq üçün elektron ünvan- [email protected]
