Azərbaycan, Bakı, 03 mart / Trend , müxbir K.Zərbalıyeva /
Azərbaycanda insan hüquqlarının müdafiəsi ilə məşğul olan qeyri-hökumət təşkilatları məhkumlara pulsuz hüquqi yardım göstərəcək.
Ədliyyə naziri yanında yaradılmış İctimai Komitənin koordinatoru, hüquq müdafiəçisi Sahib Məmmədov çərşənbə axşamı Trend -a bildirib ki, hüquqi yardım almaq istəyən məhkumlara üzləşdikləri problemlərlə bağlı hüquqşünaslar tərəfindən lazımi hüquqi məsləhətlər veriləcək.
Məmmədov deyib ki, məhkumlar arasında hüquqi yardıma ehtiyacı olanlar çoxdur.
"Məhkumlar arasında beynəlxalq instansiyalara müraciət etmək, cəzadan vaxtından əvvəl azad olunmaq istəyənlər, sənədlərinin olmaması səbəbindən təqaüd ala bilməyənlər, Apellyasiya və Ali Məhkəmə instansiyalarına şikayət etmək istəyənlər yetərincədir. Lakin hüquqi savadsızlıq səbəbindən onlar əlaqədar instansiyalara vaxtında müraciət etmirlər. Hüquqi biliklərinin lazımi səviyyədə olmaması səbəbindən bir qrup məhkum rayon məhkəmələrinin qərarlarından apellyasiya şikayəti verilmə müddətini ötürüb. Həmçinin cəzadan vaxtından əvvəl azad olunmaq üçün baxılan işlərə prokurorluq orqanlarının yersiz müdaxilələri olur", - deyə koordinator bildirib.
Hüquq müdafiəçisinin sölərinə görə, ilkin mərhələdə hüquqi yardım İctimai Komitənin hüquqşünas üzvləri tərəfindən göstəriləcək.
Sonrakı mərhələdə isə bu işə respublikanın tanınmış vəkilləri, hüquqşünasları da cəlb olunacaq.
Kənardan cəlb olunan hüquqşünaslara xidmətləri müqabilində Komitə tərəfindən qonarar ödəniləcək.
İctimai Komitə penitensiar müəssisələrdə ictimai nəzarəti həyata keçirmək və məhkumların islah olunmasında ictimaiyyətin iştirakını təmin etmək məqsədilə 2006-cı ildə yaradılıb. Komitənin tərkibi insan hüquqlarının müdafiəsi ilə məşğul olan qeyri-hökumət təşkilatlarından müsabiqə yolu ilə formalaşır. Hər yeni tərkib 1 il müddətinə fəaliyyət göstərir. Komitəyə daxil olan təşkilatlar məhkumların islahına kömək məqsədilə layihələr həyata keçirir. Komitə üzvlərinin cəzaçəkmə müəssisələrində apardığı monitorinqlərin nəticələri barədə ədliyyə nazirinə hesabat təqdim olunur.
Məqalə müəllifi ilə əlaqə ünvanı: [email protected]
