Azərbaycan, Bakı, 20 may / Trend , müxbir, K.Zərbalıyeva /
Azərbaycan Milli Televiziya və Radio Şurası (MTRŞ) "Avropa+" radiosunun lisenziyasının vaxtından əvvəl geri alınması üçün məhkəməyə müraciət edib.
MTRŞ-dan çərşənbə günü Trend -a verilən məlumata görə, bununla bağlı 1 saylı Bakı İqtisad Məhkəməsinə müraciət olunub.
"Avropa+" radiosunun nümayəndələri İqtisad Məhkəməsində işə baxılmasını qanunsuz hesab etdiyi üçün aidiyyatı barədə yuxarı məhkəmə instansiyalarına şikayət edib.
Apellyasiya və kassasiya instansiyaları şikayəti təmin etməyib və işi baxılması üçün 1 saylı Bakı İqtisad Məhkəməsinə göndərib.
Mayın 25-də "Avropa+" radiosunun lisenziyasının geri alınması barədə MTRŞ-nin iddiasına baxılacaq.
MTRŞ 2006-cı il dekabrın 8-də "Avropa+" radiosuna 6 il müddətinə lisenziya verib.
Radio dil qaydalarını pozduğu və bu barədə MTRŞ tərəfindən edilən xəbərdarlıqlara məhəl qoymadığı üçün Şuranın 30 dekabr 2008-ci il tarixli qərarı ilə lisenziyasının vaxtından əvvəl alınması barədə məhkəməyə müraciət olunub.
Məqalə müəllifi ilə əlaqə ünvanı:[email protected]
