Azərbaycan, Bakı, 14 oktyabr / Trend , müxbir K.Zərbalıyeva/
Bakıda "İslam dünyasında qadın: ənənəvi dəyərlər və müasirlik" mövzusunda beynəlxalq konfrans keçirilib.
Trend -un məlumatına görə, konfransda islam dünyasında qadınların hüquqları barəsində xarici ölkələrin təcrübəsindən istifadə etməklə müvafiq sahədə əməkdaşlığın genişləndirilməsi və inkişaf etdirilməsi prespektivləri müzakirə olunub.
Azərbaycanın Ailə, Qadın, Uşaq Problemləri üzrə Dövlət Komitəsinin təşkilatçılığı ilə keçirilən tədbirdə çıxış edən komitənin sədri Hicran Hüseynova vurğulayıb ki, bütün dünyada, o cümlədən Azərbaycanda qadın hüquqlarının təmin edilməsi sahəsində əldə edilmiş uğurlarla yanaşı, bir sıra problemlər aktuallığını saxlamaqdadır. Bununla əlaqədar islam ölkələrinin qadınlarının bütün sahələr üzrə əlaqələrinin daha da genişləndirilməsinə və qarşılıqlı faydalı təcrübə mübadiləsinə ehtiyac var.
İştirakçılar çıxışlarında vurğulayıblar ki, islam mütərəqqi bir din olaraq bəşər tarixində ilk dəfə olaraq qadına bərabər münasibətin təməlini qoyub. İslamda qadına böyük hörmət, qadın və kişinin hüquq bərabərliyi əks olunub. Bəzi müsəlman ölkələrində qadınlara qarşı ayrı-seçkiliyə yol verilməsi, qadın hüquqlarının pozulması, qadınların dövlət idarəçiliydə iştirak etməməsi pislənilib.
Konfransın sonunda bəyannamə qəbul olunub. Bəyannamədə gender ayrıseçkiliyi, qadınlara qarşı zorakılıqla mübarizəyə çağırış, münaqişələrdən əziyyət çəkən qadın və uşaqların hüquqlarının müdafiəsini təmin etmək məqsədilə səylərin artırılması, islam mədəniyyətinin beynəlxalq aləmdə təbliğində müsəlman qadınlarınım iştirakı vurğulanıb.
Tədbirdə Türkiyə, Qətər, İordaniyanın qadın problemləri ilə məşğul olan qurumları iştirak edib.
Məqalə müəllifi ilə əlaqə ünvanı: [email protected]