Azərbaycan, Bakı, 29 oktyabr / Trend , müxbir H.Bağırov/
Azərbaycan paytaxtındakı yaşayış binasında insan ölümü ilə nəticələnmiş partlayışda təqsirli bilinənlərin məhkəmə prosesi keçirilib.
Prosesdə dövlət ittihamçısı çıxış edib. Trend -un məlumatına görə, prokuror təqsirləndirilənlər Elman Niftəliyevə 8 il 6 ay, Rəşad Şıxməmmədova isə 5 il azadlıqdan məhrumetmə cəzasının verilməsini məhkəmədən xahiş edib.
Ötən il dekabrın 13-də Bakının Nizami rayonu, Naxçıvanski küçəsi, 34 nömrəli binada partlayış baş verib. Nəticədə 40 mənzil yararsız vəziyyətə düşüb, 3 nəfər dünyasını dəyişib. Hadisəyə görə həmin binanın 29-cu mənzilində fəhlə işləyən Samir Qəhrəmanov, Pərviz Zülfüqarov, Rəşad Şıxməmmədov və Elman Niftəliyev cinayət məsuliyyətinə cəlb olunub. Qəhrəmanov və Zülfüqarov sonradan sərbəst buraxılıb, Niftəliyev və Şıxməmmədov isə həbsdə saxlanılıb.
Prokurorun çıxışından sonra vəkillər çıxış edib. Vəkillər təqsirləndirilən şəxslərin günahsız olduqlarını bildiriblər və onların barəsində bəraət hökmünün çıxarılmasını istəyiblər.
Təqsirləndirilən şəxslər Cinayət Məcəlləsinin 124.2-ci (ehtiyatsızlıqdan iki və ya daha çox adamı öldürmə) maddəsi ilə ittiham olunurlar.
Məqalə müəllifi ilə əlaqə ünvanı: [email protected]