Azərbaycan, Bakı, 26 noyabr / Trend , müxbir H.Bağırov/
Azərbaycan paytaxtında bir ailənin üç üzvünü qətlə yetirən Bakı sakinin məhkəməsi başlayıb.
Trend -un məlumatına görə, bu gün Ağır Cinayətlərə Dair İşlər üzrə Məhkəmədə Bakı şəhər sakini, 1957-ci il təvəllüdlü Ələsgər Mövlud oğlu Ələkbərovun cinayət işi üzrə məhkəmənin hazırlıq iclası keçirilib. Məhkəmə baxışı dekabrın 4-nə təyin edilib.
Bu ilin avqustun 21-də Bakı şəhəri, Əliağa Şıxlinski küçəsi, ev 51, mənzil 10-da pasport qeydiyyatında olan Ələkbərov Əzizbəyov rayonu, Buzovna qəsəbəsinin Albalılıq dayanacağı, Nəriman Əliyev küçəsində yerləşən həyət evində Jalə Rahib qızı Ələkbərovanı, azyaşlı uşaqları - 8 yaşlı Xatimə Ələkbərovanı və 1 yaşlı Tapdıq Ələkbərovu bıçaqla çoxsaylı xəsarətlər yetirməklə, xüsusi amansızlıqla qəsdən öldürüb.
Ələkbərov Nərimanov Rayon Polis İdarəsinin 16-cı polis bölməsinə gələrək könüllü təslim olub.
Ələkbərov Cinayət Məcəlləsinin xüsusi amansızlıqla və ya ümumi təhlükəli üsulla adam öldürmə (120.2.4), iki və ya daha çox şəxsi qəsdən öldürmə (120.2.7), təqsirkar şəxs üçün aşkar surətdə köməksiz vəziyyətdə olan adamı öldürmə (120.2.9), quldurluq, hədə-qorxu ilə tələb etmə, terrorçuluq və ya banditizmlə əlaqədar adam öldürmə (120.2.11) maddələri ilə ittiham olunur.
Məqalə müəllifi ilə əlaqə ünvanı: [email protected]