Azərbaycan, Bakı, 08 dekabr / Trend , müxbir A.Hüseynbala/
"2009-cu il üçün keçirilən müsabiqənin qalibi olan "Azəri Yurdu" İctimai Birliyi müqavilə öhdəliklərinə əməl etmədiyinə görə təşkilata ödəniləcək ikinci məbləğ dayandırılıb", - çərşənbə axşamı Trend -a Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev bildirib.
Trend -un arayışı: QHT-lərə maliyyə yardımı ilə bağlı 2009-cu il üçün müsabiqə yanvarın 15-də elan edilib və sənədlərin təqdim etmə müddəti fevralın 15-də başa çatıb. Bu il Şuraya 569 layihə təqdim edilib. Layihə təqdim edən QHT-lərin Şuradan istədiyi məbləğ ümümilikdə 9 milyon manata yaxın olub, amma Şuranın müsabiqə fondu bundan dəfələrlə az - 2 milyon 68 manat təşkil edib. Müsabiqəyə təqdim edilən layihələrdən 226-sı Şura tərəfindən dəstəklənib və onlara ümumilikdə 1 milyon 848 min manat vəsait ayrılıb.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yaradılması haqqında Prezident İlham Əliyev dekabrın 13-də 2007-ci il dekabrın 13-də fərman imzalayıb.
Quliyevin sözlərinə görə, həmin ictimai birlik təqdim etdiyi layihənin icrasını effektli təmin etməyib. "Bizim elan etdiyimiz müsabiqə nəticəsində qalib olan QHT-ləri üç istiqamətə bölürük. Birincisi, layihələri ən yaxşı icra edən təşkilatlardır. Bunların sayı kifayət qədərdir. İkincisi, layihələri yaxşı icra edənlərdir. Layihələri kafi icra edən təşkilatlar isə üçüncü qrupa aiddir. Həmin QHT-lər təcrübənin azlığından layihələrin yerinə yetirilməsində problemlə üzləşiblər", - şura sədri əlavə edib.
Onun fikrincə, əsas məqsəd bütün QHT-lərin fəaliyyətində müsbət mənada irəliləyişə nail olmaqdır. "Biz layihələri bütün tələblərə uyğun yerinə yetirilmədikləri üçün cəzalandırsaq, onlar təşkilat kimi məhvə məhkumdurlar. Məqsədimiz nöqsanları aradan qaldırmaqla QHT sektorunun daha da güclənməsinə nail olmaqdır", - Quliyev vurğulayıb.
Bununla belə, şura sədri layihələri tələblərə uyğun isra etməyən QHT-lərin qeydiyyatının ləğv olunması ilə bağlı məsələnin gündəmə gələcəyini də istisna etməyib. "Xarici ölkələrdə belə bir təcrübə var. QHT-lərin cəza növü kimi onun dövlət qeydiyyatının və imtiyazlarının ləğv olunması, bütövlükdə ictimai faydalılıq göstəricilərinin əlindən alınması bir növ digərləri üçün örnək olur. Düşünürəm ki, QHT-lər bunu mütləq nəzərə almalıdır və qanunsuz hərəkət etmiş heç bir təşkilata güzəştə getmək niyyətimiz yoxdur", - o xatırladıb.
2010-cu il üçün maliyyə müsabiqəsinə gəldikdə, Quliyev bu prosesin dörd mərhələdə keçiriləcəyini qeyd edib. "Birinci mərhələ üçün layihələr dekabrın 8-dən yanvarın 15-nə qədərdir. Fikrimcə, ikinci mərhələyə aprel ayında start vermək olar. Növbəti mərhələdə müsabiqə beynəlxalq təşkilatlar və yerli donorlarla birgə həyata keçiriləcək. Dördüncü mərhələnin müsabiqəsi isə sərbəst mövzuda olacaq", - şura sədri deyib.
Onun sözlərinə görə, ümumilikdə 2010-cu ilin maliyyə müsabiqəsi üçün 2 milyon 063 min manat vəsait nəzərdə tutulub.
Məqalə müəllifi ilə əlaqə ünvanı: [email protected]
