Azərbaycan, Bakı, 1 iyun /Trend, müxbir M. Əliyev/
Azərbaycan Gənclər və İdman Nazirliyi və Sülh Mədəniyyəti Naminə Gənclər İctimai Birliyi gənclər üçün erkən nikahların törətdiyi fəsadlarla bağlı maarifləndirici layihə həyata keçiriblər. Bu barədə məlumatı Trend-ə çərşənbə axşamı Gənclər və İdman Nazirliyindən bildiriblər.
"Erkən nikahların törətdiyi fəsadlara dair maarifləndirici kampaniyaların təşkili" adlı layihə çərçivəsində Şəki şəhərində, Zaqatala, Oğuz, Qəbələ və digər rayonlarda fəaliyyət göstərən gənc fəallar üçün təlimlər təşkil olunub. Təlimdə erkən, qeyri-rəsmi nikahlar və onların törətdiyi fəsadlar haqqında danışılıb, fikir mübadilələri aparılıb.
Təlim zamanı "Təmiz dünya" İctimai Birliyi tərəfindən təqdim edilmiş "Günahkarlar, yoxsa günahsızlar" filmi nümayiş etdirilib və bir sıra kitabçalar paylanılıb.