Gürcüstan Azərbaycanlıları Konqresi bir qrup şəxsin keçirəcəyi qurultayı qeyri-legitim sayır
Azərbaycan, Bakı, 26 noyabr /Trend/
Gürcüstan Azərbaycanlıları Konqresi (GAK) təşkilatın təsisçisi olan 3 şəxsin noyabrın 27-də keçirmək istədiyi növbədənkənar qurultayı qeyri-legitim hesab edir. Bu barədə cümə günü GAK-ın mətbuat xidməti məlumat yayıb.
GAK hesab edir ki, qurultay qeyri-legitim olduğundan qəbul ediləcək qərarlar tanınmayacaq. Bu barədə qərar GAK-ın idarə heyətinin iclasında qəbul olunub. İclasda idarə heyətinin üzvləri bildiriblər ki, həmin 3 şəxsin GAK və onun sədrinə qarşı apardığı böhtan xarakterli kampaniyanın heç bir əsası yoxdur. GAK üzvləri bəyan ediblər ki, Gürcüstan azərbaycanlılarının təmsil olunduğu QHT-lər, ictimaiyyət nümayəndələri və ziyalılarla görüşlər sübut edib ki, bir qrup şəxsin apardığı "qara piar" kampaniyası təşkilatın nüfuzuna heç bir xələl gətirməyib.
GAK sədri Əli Babayev bildirib ki, təşkilatın nizamnaməsinə əsasən, qurultay 4 ildən bir keçirilir və bütün qərarlar təşkiltaın 11 təsisçisi tərəfindən qəbul olunur. "Bir qrup şəxsin qanunsuz olaraq keçirmək istədiyi növbədənkənar qurultayın heç bir legitimliyi yoxdur və əsassızdır. GAK həmin qurultayın nəticəsini tanımayacaq", - Babayev deyib.
GAK sədrinin sözlərinə görə, təşkilat əvvəlki kimi, nizamnaməyə uyğun olaraq fəaliyyətini maneəsiz davam etdirir.
Bir müddət öncə GAK nümayəndəsi Kamil Əliyev bildirmişdi ki, GAK sədri Əli Babayev ilə Konqresin digər təsisçiləri arasında qarşıdurma yaranıb. Yaranmış vəziyyəti aradan qaldırmaq, GAK-ı xalqa və dövlətə xidmət edən təşkilat formasına gətirmək üçün təsisçilər növbədənkənar qurultayın çağırılması üçün qərar qəbul ediblər.
GAK 2008-ci il martın 17-də təsis olunub. GAK-ın yaradılmasında məqsəd Gürcüstan azərbaycanlılarının hüquqlarının effektiv müdafiəsi, ölkənin vətəndaş cəmiyyətinə inteqrasiyasını təmin etməklə onların digər ölkələrə miqrasiyasının qarşısını almaqdır.
Qeyri-rəsmi məlumatlara görə, Gürcüstanda 500 min azərbaycanlı yaşayır.
